Алатай гьафтеда Дагъустандин жемиятдин уьмуьрда кьиле фейи лишанлу мярекатрикай сад республикадин мулкарал зирзибил гьялдай заводар эцигунин месэлайриз талукьарнавай, РД-дин Кьил Сергей Меликован иштираквал аваз тешкилай гуьруьш хьана. Адан сергьятра аваз «Урусатдин экологиядин оператор» компаниядин векилри заводрин проектдиз талукьарнавай презентация къалурна.
Пешекаррин гьисабунралди, алай вахтунда Дагъустанда миллион тонндилай артух зирзибил кIватI жезва. Агьалийрин кьадар артух хьуникди зирзибилдин кьадарни йисалай-суз гзаф жезва.
Сергей Меликова къейд авурвал, икьван чIавалди республикада кьабулнавай серенжемривай и месэла тамамдиз гьялиз хьанач. Санитариядин жигьетдай гьалар пайгардикай хкатунин хаталувал авай. И кар фикирда кьуна, республикада махсус комплексар эцигдай къарар кьабулна.
Винидихъ тIвар кьур компаниядин векилри зирзибил гьялдай заводар эцигдай къайдайрикай гегьеншдиз ихтилатна ва абурукай я чкадин агьалияр, я тIебиат патал са зарарни авачирди, мисалар гъиз, тестикьарна.
— Чи макьсад, — лагьана С.Меликова, — алай аямдин вири истемишунриз жаваб гуз алакьдай комплексар арадал гъун я. Идалай гъейри, гележегда заводар кардик акатайла, тIебиатдиз зарар гун мумкин тир гьар са дуьшуьш арадай акъудун патал карханайрин кIвалах кьетIен гуьзчивилик кутада. Гьар са карханадиз Росприроднадзорди ахтармишунар кьиле тухвайдалай кьулухъ махсус лицензия гуда, — лагьана республикадин Кьили.
Къейд ийин хьи, зирзибил гьялдай чIехи комплексар Хасавюрт, Дербент ва Къарабудахкент районра эцигда. Идалай гъейри, Хасавюрт, Дербент ва Къумторкъала районра полигонарни кардик кутадайвал я. Республикадин дагълух 36 районда зирзибил кIватIиз комплексриз рекье твадай станциярни арадал гъида.
Гегьеншдиз РД-дин Кьилин сайтдай кIелиз жеда.
Агьмед Магьмудов
