10-сентябрдиз Дагъустандин Кьил Сергей Меликова Украинада кьиле физвай махсус серенжемдин иштиракчи Азамат Мамаевахъ галаз гуьруьш кьиле тухвана. Идакай «Лезги газетдиз» РД-дин Кьилин пресс-къуллугъди хабар гана.
25 йис хьанвай Азамат Мамаев алай йисан январдин вацра гуьгьуьллудаказ серенжемда иштиракиз фена. Са женгина залан хер хьуникди адавай уьлкведин Яракьлу Къуватрин жергейра къуллугъ давамариз хъхьанач, ам республикадин военкоматда кIвалахал акъвазна.
Азамат Мамаев етим я. 2016-йисалай ам государстводин патай етимриз гьавая гузвай кIвал къачун патал нубатда акъвазнавай, амма жегьилдиз кIвал чара авунач. Месэла суд-дувандал гьялдайвал хьана. Къанунди Азамат Мамаеван пад хвена, амма кIвалах явашдиз вилик физвай. Эхирни ада «Защитники Отечества» фондунин республикада авай филиалдивай куьмек тIалабна. Адан месэладиз гьасятда РД-дин Кьил Сергей Меликова фикир гана.
Алай вахтунда Азамат вичин хизандихъ галаз кирида кьунвай кIвале яшамиш жезва. РД-дин транспортдин ва рекьерин майишатдин министр Жамбулат Салавова адаз пулдин куьмекар гузва. Жегьил аскердиз 3 утагъдикай ибарат тир кIвалер чара авунва, исятда ана ремонтдин кIвалахар кьиле физва. Мукьвара ам хизанни галаз цIийи кIвализ куьч жеда.
И карда вичиз куьмекар гунай Азамат Мамаева Сергей Меликоваз, РД-дин Гьукуматдин Председателдин сад лагьай заместитель Руслан Алиеваз, вице-премьер Абдурагьман Магьмудоваз, Махачкъаладин мэр Юсуп Умавоваз ва Жамбулат Салавоваз сагърай лагьана.
— Вунни сагърай, Азамат, — лагьана гуьруьшдин вахтунда Сергей Меликова. — Вуна халис дагъвидин къилих къалурна: гуьгьуьллудаказ гъиле яракь кьуна, Ватан хуьз фена. Хайи чил хуьзвайбуруз вири рекьерай куьмек гунин карда чи хиве жавабдарвал ава. Чун ви яшайишдин шартIар жезмай кьван хъсанариз алахъда. Чи куьмекдик вавай гьамиша умуд кутаз жеда, — алава хъувуна республикадин Кьили.
Чи мухбир
