Дагъустандин халкьарин садвилин йикъаз талукь яз СтIал Сулейманан райондин дявединни зегьметдин, яракьлу кьушунрин, къайдаяр хуьдай органрин ветеранрин советрин президиумдин заседание кьиле фена. Ана райондин кьил Нариман Абдулмуталибова, администрациядин крар идара ийидай управленидин руководитель Рамазан Абдулазизова иштиракна.
Ветеранрин советдин председатель Ислеман Ризаева 2020-йисуз ва 2021-йисан сифте паюна кьиле тухвай крарикай малумат гана. Райондин дявединни зегьметдин ветеранриз, пенсионерриз медицинадин рекьяй гьикI къуллугъзаватIа, гьадакай райондин больницадин кьилин духтурдин заместитель Шемей Исаевади ва духтур Эльяр Исрафилова суьгьбетна.
И.Ризаева райондин ветеранрин совет арадал атайдалай инихъ къведай йисуз 40 йис тамам жезвайди ва и вакъиадиз гьазурвал акуна кIанзавайди лагьана.
Райондин собранидин депутат, Цмуррин хуьруьн Гъалибвилин музейдин директор Нариман Агъабегова вичи музейда тухузвай кIвалахрикай, адакай жегьилриз ватанпересвилин тербия гунин карда авай менфятдикай ихтилатна.
Жемиля Багъишева
