Меркездин Дуствилин кIвале Дагъустан Республикадин милли сиясатдин ва динрин крарин рекьяй министерстводи тешкилнавай “Терроризмдиз акси яз тухузвай кIвалахдикай кхьенвай лап хъсан материал” конкурсдин нетижаяр кьуна.
Журналистрихъ галаз кьиле фейи гуьруьшда министр Энрик Муслимова, гъалибчияр тебрикунихъ галаз сад хьиз, лагьана:
— Исятда терроризмдикай гьикьван кхьидайди я, Дагъустанда секин я кьван лугьудай ванер къвезва. Эхь, секин хьанва, терактар ва маса чIуру гьерекатар амач. Амма жаванрин арада терроризмдин идеология чукIурзавайбур, абур чпин тапаррин чилина твазвайбур ксанвач, абуру чинеба, социальный сетрин куьмекдалди кIвалахзава. Гьавиляй чи дикъетлувал, мукъаятвал мадни артух хьана кIанзава. Республикада терроризмдин, экстремизмдин гьерекатар мад тахьун патал гьукуматдин ва обществодин вири къатари чалишмишвалзава. Иник куьне кутазвай пайни гъвечIиди туш. Заз акуна ва чизва, 1999-йисалай чи журналистри четин гьалара зегьмет чIугвазва, терроримздин идеологиядиз акси материалар кхьизва, передачаяр гьазурзава. Квез аферин! Куь зегьмет чна инлай кьулухъни къейд ийида.
Дагъустан ва гьакI уьлкве патални терроризмдикай авай хаталувиликай, зияндикай “Лезги газетдин” сиясатдин отделдин редактор Н. Ибрагьимова, политолог Х. Къурбанова, радиодин ва телевиденидин журналистар Б. Стамбуловади, С. Мамедова лагьана.
Конкурсдин вад номинациядай (“Телевиденидин лап хъсан программа”, “Радиодин лап хъсан программа”, “Республикадин СМИ-ра чапнавай лап хъсан макъала”, “Лап хъсан видеоролик”, “Интернетдин лап хъсан макъала”) гъалибвал къачурбурув (вири 25 кас) Э. Муслимова дипломар ва премияр вахкана.
Азад Абадов
____________________________________________________
Сагърай лугьузва
Гьуьрметлу ватанэгьлияр!
РД-дин милли сиясатдин ва динрин крарин рекьяй министерстводин конкурсда гъалибвал къачунай заз ва газетдин редакциядин коллективдиз гзаф инсанри (Дагъустандай, Азербайжандай, Голландиядай, Украинадай, Тюмендай, Санкт-Петербургдай, Москвадай, Новороссийскдай…) тебрикар авуна. За виридаз рикIин сидкьидай сагърай лугьузва. Квехъ виридахъ, гьина аватIани, яшайишда, зегьметда, кIелунра еке агалкьунар хьурай!
Квез гьуьрметзавай Нариман Ибрагьимов
