Владимир шегьер Россиядин “Къизилдин гьалкъадин” варар я. Ина чи лезги миллетдин векиларни, чпин баркаллу краралди машгьур яз, еке гьуьрмет аваз яшамиш жезва. Абурукай сад вичин ери-бине Хив райондин ЗахитIрин хуьряй тир Алирзаев Магьарам Алирзаевич я.
Султан дидедиз Магьарам 1965-йисан 23-мартдиз хьана. Кьуд вахахъ авай са стха тир ам виридан гъилераллаз чIехи жезвай. Буба Алирза школадин къаравул тир. Уьмуьрдин цурувилер дадмишнавай бубадиз вири дуьнья вичин хцин вилерай аквазвай.
Хуьруьн мектебдин 8-класс куьтягьай Магьарам харат устIардин пеше къачун патал Дербент шегьердин 16-нумрадин ГПТУ-дик экечIна. КIелдай йисара жегьилди училищедин общественный крарани иштиракзавай. Ада шегьердин газетдиз гъвечIи-гъвечIи макъалаярни кхьизвай, азад вахтунда пивзаводда фялевални ийизвай. Са гафуналди, ам вичин кьил акъудиз вердиш хьана. Магьарама шегьердин олимпиадайра хъсан чкаяр кьазвай. Зирек гадади ГПТУ яру диплом аваз акьалтIарна. Гьеле училищеда кIелдай йисара Магьараман руьгьди чIехи чирвилерихъ ялзавай. Кьисметди ам Владимир шегьердиз тухвана. Жегьил дагъви ана политехнический институтдин эцигунрин факультетдик экечIна. Сад лагьай курс акьалтIарайла, Магьарам армиядин жергейриз тухвана. Ам Рязанда авай гьавадин десантный частуниз акъатна. Алирзаева вичин къуллугъдин везифаяр чешнелудаказ кьилиз акъудзавай.
Аскервиляй хтайла, Магьарама вузда кIелун давамарна. Институтдани ам вилик жергейра авай студент тир. Хъсандиз кIелиз акурла, амни Чехословакиядиз физвай студентрин са дестедик кутуна, аниз рекье тунай. Вуз акьалтIарайла, жегьил пешекар Владимирский областдин Петушинский райондин Городищи лугьудай поселокда авай фабрикадиз кIвалахал рекье туна. Ина адакай эцигунардай инженер хьана. Хци кьатIунар авай жегьил пешекар са куьруь вахтунда лап еке дережайрив агакьна. Адакай фабрикадин транспортдин отделдин начальник хьана. Адан гъилик саки 300 касди кIвалахзавай. Ахпа Магьарам мадни са шумуд кIарцIин хкаж хьана. Гуьгъуьнлай Магьарам Алирзаевича “Продсервис” тIвар ганвай вичин хсуси кархана ачухна. Ана кар хъсандиз чидай ксарихъ галаз кIвалахиз башламишна.
Дерин чирвилер авай, далу акализ жедай, гафунал кIеви кас хьуниз килигна, бязи идарайрин руководителри, ярар-дустари М.Алирзаеваз вичин кандидатура чкадин собранидин депутатвиле къалурун меслятнай. “Сад тир Россия” партиядин член М.Алирзаев са шумуд созывдин депутат хьана, 2011-йисуз ам Городищи поселокдин депутатрин собранидин векилвиле хкяна. 2015-йисалай инихъ ам поселокдин администрациядин кьиле ава. И поселокда тайин мурадрихъ элкъуьрнавай программадин бинедаллаз вири кIвалахар вахт-вахтунда кьиле тухузва.
Магьарам Алирзаевича, кеспидихъ галаз алакъалу, везифайривай къерех тахьана, Президентдин къуллугъдин академияни куьтягьна. М.Алирзаевахъ Владимирский областдин губернатордин ва Петушинский райондин руководстводин, депутатрин корпусдин чIехибурун къулар алай, адан крариз еке къимет гузвай чарар, грамотаяр пара ава. Ам поселокдин агьалийрин яшайиш хъсанарунин къайгъуда ава. Ина алай вахтунда 17 агъзур касдив агакьна агьалияр яшамиш жезва.
Поселокдин йикъан мярекатар тухудайла, М.Алирзаев жемятдин вилик чими келимаяр рахана. Ам Городищидин пакадин югъ мадни бахтаварди жедайдахъ агъунва.
Магьарам Алирзаевичахъ дуьзгуьн хизан ава. Уьмуьрдин юлдаш, Владимир шегьерда экономиствилин пешекарвал къачунвай захитIви Рагинат “Продсервис” карханадин сагьиб я. Абурухъ кьве велед ава: Камил ва Фазил. Фазил духтур-хирург я, ада Москвада кIвалахзава, адан кайванини духтур я. Камилан сусани духтурвилин пеше хкяна. Камила вичи Газпромдин къурулушда кIвалахзава.
ЧIехи буба Магьарама азад вахт вичин хтулрихъ галаз кечирмишзава. Абурухъ галаз къугъвадайла, адан вилерикай вичин аял вахтар карагзава. Иллаки — буба Алирза, адан экуь къамат. КIелдай йисара буба са шумудра Владимир шегьердиз атанай ва вичин хцел, дамахдивди вил вегьена, адаз багъри ерийрихъ хтун меслятнай. Амма Магьарамаз ацIай, гуьзел дуьнья Владимирский областдай акуна ва ам, вичин уьмуьрдал рази яз, ина амукьна. 1983-йисалай М.Алирзаев кьисметди къалурай Городищи лугьудай чкада яшамиш жезва. Поселокни чIехи хьана, адахъ галаз чи лезги хвани.
Магьарам гьамиша вичихъ рикI кузвай вахарилайни рази я. Адан пуд вах Дербентда, сад Москвада яшамиш жезва. Магьарам Алирзаевича областда яшамиш жезвай дагъустанвийриз гьар жуьре куьмекар гузва. Адахъ мерд ва вафалу гзаф дустар ава, чебни вири миллетрин арадай.
Чи дагъларин хва Алирзаев Магьарам Алирзаевича, лезги намус, бубайрилай агакьай акьул-камалдин тарсар рикIел хвена, Владимирский областда чешнелудаказ кIвалахзава. Эхь, заз ам вини дережадин къанажагъ авай, кар алакьдай ва инсандин къадир авай мергьяматлу кас яз акуна.
Яшамишрай Владимирский областда авай вири лезгияр, кьиле чи Алирзаев Магьарам Алирзаевич аваз.
Бикеханум Алибекова
