Белиж поселокда администрациядин кьилин къулугъдал кIвалахай Юсуф Азизован экуь къамат эбеди яз рикIера хуьнин лишан яз волейболдай турнир кьиле фена.

Ана Дербент райондин Агълабар, ЛукIар, Нуьгди, Белиж хуьрерин, Белиж поселокдин ва Мегьарамдхуьруьн рай­ондин Хъартас-Къазмайрин командайри иштиракна.   Турнирдин судья Закир Идрисов тир.

Мярекатдиз Белиж поселокдин кьил Рамиз Гьабибулаев, поселокдин депутатрин Собранидин председатель А.Сефербегов, азаддиз кьуршахар кьунай дуьньядин чемпион Вагиф Къазиев, райондин ва поселокдин депутатар, школайрин директорар, общест­венный тешкилатрин векилар, Ю.Азизован стха Гьамид Азизов, адан гада Мамед, хтул Зу­раб Тагьиров ва масабур атанвай.

Анал рахай Р. Гьабибулаева, 3-нумрадин школадин директор М.Магьмудова,  А.Сефербегова, муаллимри ва масабуру Ю.Азизован уьмуьр­дин ва кIвалахдин рекьикай хуш келимаяр лагьана, поселокдин агьалийрин рикIел ам эбеди аламукьдайди къейд авуна.

Турнир тешкиллудаказ кьиле фин патал Юсуф Азизован багърийри, Белиж по­селокдин кьил Рамиз Гьа­бибулаева, “ОТЕГ” фирмадин руководитель Мегьамед­расул Омарова къаюмвал авуна.

1-чкадиз Белиж по­селок­дин, 2-чкадиз Белиж, 3-чкадизни Нуьгди хуьрерин командаяр лайихлу хьана.

Тешкилатчийри турнирда иштиракай командайриз къиметлу пишкешар гана.

Дагъви Шериф