28-февралдиз Докъузпара райондин кьил Абдурагьим Алискеров кьиле авай дестеди и райондин ЦIийи Къара-Куьре хуьруьн яшайишдин объектрин гьалариз килигна.  

Серенжемда райондин прокурор М.Назирова, образованидин управленидин начальник Гъ.Шагьвеледова, райондин кьилин заместитель С.Гьажимурадова ва финансрин управленидин начальникдин заместитель Н.Гъафурова иштиракна.

Сифте нубатда абур хуьруьн администрациядин дараматдиз фена. Райондин кьили гьар са кабинет ва анра авай чимивал ахтармишна. Бязи кабинетра талукь тегьерда чимивал авачирвиляй, райондин кьили хуьруьн администрациядин кьилиз тади гьалда и нукьсан арадай ахкъудунин тапшуругъ гана.

Райондин делегация «Аленушка» аялрин бахчадизни фена, михьивал ахтармишна. Гуьгъуьнлай райондин кьили бахчадин заведующийдихъ ва къуллугъчийрихъ галаз совещание тухвана.

Эхирдай хуьруьн мектебдин кабинетрин, спортзалдин гьални ахтармишна, анин директор Т.Муллинадихъ галаз гуьруьшмиш хьана.

Санлай къачурла, райондин кьил яшайишдин объектрин гьаларилай рази яз амукьна. Авай куьлуь-шуьлуь нукьсанар муниципальный дережада арадай акъуддай мумкинвал ава.

«Лезги газет»