И йикъара Мегьарамдхуьруьн райондин кьил Фарид Агьмедова райондин хуьрерин администрацийрин кьилерихъ, мектебрин директоррихъ ва райондин Собранидин депутатрихъ галаз тухвай совещанидал «100 мектеб» проект алай йисуз уьмуьрдиз кечирмишунин месэла веревирдна. Идакай «Лезги газетдиз» райадминистрациядин пресс-къуллугъди хабар гана.  

Райондин кьили республикадин «100 мектеб» проектдикай, адан макьсадрикай ихтилатна. РД-дин кьил В.Васильеван теклифдалди кардик кутунвай и проектдин сергьятра аваз образованидин идараяр ремонтзава.

— Чна и программада иштиракун патал арзаяр агакьарун лазим я. Гьа са вахтунда и кардик къуьн кутун яз, чкадин бюджетдайни такьатар чара авун ва меценатарни желбун чарасуз я., — къейдна Ф.Агьмедова.

Райондин образованидин управлениди малумарзавайвал, 10 мектебдин дараматдиз ремонт герекзава. Совещанидин сергьятра аваз и цIуд мектебдин гьалар, гьа жигьетдай яз техникадин базани галай-галайвал веревирдна.

Къейд ийин, тIвар кьунвай проект республикада алатай йисалай кардик ква. И кар патал 2018-йисуз республикадин бюджетди 200 миллион манатдин кьадарда аваз пулдин такьатар чара авуна. Проект кьилиз акъудунин кар алай йисуз мадни гегьеншдиз давамардайвал я.

«Лезги газет»