Яшамиш хьунин агъа кIанин кьадардилай тIимил къазанжи авай ватандашдиз ва я хизандиз государстводи гузвай куьмекдин жуьре я яшайишдин икьрар.
Яшайишдин икьрардин жуьреяр са шумуд ава. Абурукай чна агъадихъ кьилди малуматар гузва.
Куьмекдин майишат еримлу авун. Хуьруьн майишатдин техника, штилар, тум, кIвалин гьайванар ва къушар маса къачун патал хизандивай 200 агъзур манат пул государстводин патай къачуз жеда.
Ихьтин са шартI ава: арзачиди гуьгъуьнлай хуьруьн майишатдин суьрсет маса гуналди къазанжи къачуз хьайитIа, анжах гьа дуьшуьшда яшайишдин икьрар кьилиз акъатнавайди яз гьисабзава. Са тIимил кьванни къазанжи къачун шартI я.
КIвалахдихъ къекъуьн. КIвалахдик квачир касди кIвалахдал машгъулардай центрада регистрация авурла, адаз бейкарвиляй пособие талукь жезва. Ана регистрация авунихъ галаз сад хьиз, ватандашдивай яшайишдин рекьяй хуьдай органра кIвалах жагъурунин икьрар кутIуниз жеда. Яшайишдин икьрар кутIунайдалай кьулухъ бейкардиз яшамиш хьунин агъа кIанин кьадарда аваз са сеферда пулунин такьатар гуда. КIвалах жагъайдалай кьулухъни адав и жуьреда пуд вацра пуд пособие ахгакьда.
Чирвилер къачун. Яшайишдин икьрардин бинедаллаз мад сеферда чирвилер къахчудай ва я алава курсар кьилиз акъуддай мумкинвал анжах бейкарриз ава. И такьатри чирвилер къачунин гьакъи эвез ийида. Амма чара ийизвай пулунин вини кьадар 30 агъзур манат я. Жуван рикIиз хуш хел хкядай мумкинвал ава: жуван пешедай дережа хкажайтIани жеда, маса пешедай цIийи чирвилер къачуртIани.
Бизнес ачухун. Яшайишдин икьрардин и жуьредай виридалайни гзаф пул чара ийизва — 300 агъзур манат. И такьатар жуван кардик кьил кутун патал гузва. Кьилди къачуртIа, пул дарамат (ва я маса чка) кирида къачуниз, мебель ва маса тадаракар маса къачуниз, рекламадин тешкилатдиз харждай ихтияр ава. Кьилин шартI ам я хьи, чара ийизвай такьатар анжах бизнес вилик тухун патал серфна кIанзава. Икьрардин бинедаллаз пул къачунвай касди ам харж авур рекьер чекералди, икьрарралди, распискайралди тестикьарун герек я.
Агьвал хъсанарун. Эменни, агьвал тIимил авай хизанривай яшайишдин икьрардин бинедаллаз пулунин алава куьмек къачуз жеда. Ихьтин мумкинвал уьлкведин гьукуматди 2021-йисалай ганва. Чара авур пул ихьтин рекьериз харж ийиз жеда:
— лап чарасуз суьрсетар къачуниз;
— парталар ва кIвачин къапар маса къачуниз;
— дарманриз ва сагъар хъувуниз;
— классдилай къеце алава тарсариз;
— мектебда герек затIариз;
— ЖКХ-дин гьакъи гуниз.
«Лезги газет»
