Дагъустандин Гьукуматдин Председатель Абдулмуслим Абдулмуслимова 22-июлдиз ЖКХ-дин идараяр зулунни хъуьтIуьн варцара кIвалахиз гьазур хьунин месэлайриз талукьарнавай республикадин штабдин заседание кьиле тухвана.
Адан кIвалахда Роспотребнадзордин РД-да авай управленидин, РД-дин эцигунрин, архитектурадин ва ЖКХ-дин министерстводин, «Россети Северный Кавказ» — «Дагэнерго» ПАО-дин филиалдин, «Единый оператор в сфере водоснабжения и водоотведения» АО-дин, «Газпром межрегионгаз Махачкала» ООО-дин векилри ва маса жавабдар ксари иштиракна.
Заседанидал республикадин ЖКХ-дин идараяр 2025-2026-йисарин зулунни хъуьтIуьн варцара кIвалахиз гьазур хьуниз, муниципалитетрин мулкарал агьалияр хъвадай целди таъминардай центральный къурулушра санитариядин рекьяй хатасузвал таъминарун патал кьабулдай серенжемриз, электросетрин комплекс гатуз акьалтзавай гужарай экъечIиз гьазур хьанвай дережадиз, яшайишда газ ишлемишунихъ галаз арадал къвезвай бязи татугайвилер арадай акъудуниз талукь месэлайриз килигна.
Мярекатдин сифте кьиляй РД-дин Гьукуматдин Председателди оперативный штабдин виликан заседанидал вилик эцигай везифаяр кьилиз акъуднавай гьалдикай малумат гун истемишна.
«Оперативный штабдин 25-июндиз кьиле фейи заседанидал гатун вахтунда тади ганвай тадаракар мад сеферда ахтармишунин, электросетрин майишатдин объектрал профилактикадин ва ремонтдин кIвалахар кьилиз акъудунин, гзаф чими хьуникди электросетрин линияр къайдадикай хкатайла, абур ремонтдай бригадаяр, диспетчеррин дестеяр гьазур хьунин месэлайриз талукь везифаяр эцигнай. Къе чаз кьуру рахунар герек авач. Алай вахтунда республикадин ЖКХ-дин гьар са объектда, электросетрин, газдин идарайра гьихьтин гьалар аватIа, абур зулунни хъуьтIуьн варцариз гьикI гьазур хьанватIа, чир хьун лазим я. Анжах гьа икI хьайила, чавай вахтунда менфятлу къарарарни, серенжемарни кьабулиз жеда», — лагьана А. Абдулмуслимова.
Агьалийрин патай эквер хкатуниз талукь гзаф кьадар арзаяр атайвиляй премьер-министр Абдулмуслимова «Дагэнергодиз» агьалияр вахтунда хабардар авунин кIвалах гужлу авун меслятна. РД-дин ЦУР-диз 19-21-июлдин йикъара эквер хкатай дуьшуьшрикай хабар гузвай 102 арза атана.
«Чун чи агьалийрин къайгъуда авай инсанар я ва гьавиляй чна абур герек вири шейэралди таъминарни авуна кIанда. Идан гьакъиндай чна са шумуд сеферда эзбер авурди я. Республикадин Кьил Сергей Алимович Меликова инсанар хабардар авунин месэладикай гьамиша лугьузва. Инсанри суьрсет маса къачузва, холодильникра эцигзава. 30 градусдин чимивал авай вахтунда кIвалер кьве суткада экверикай хкудзава. Гзаф кьадар инсанри чпин суьрсет пенсиядихъ маса къачузвайди я. Эквер авачирла, амни чIур жезва. Чна агьалийрин яшайиш сифте чкадал эцигна кIанда. Чна лугьузвач хьи, куьне кIвалахзавач. Везифаяр кьилиз акъудзава. Ингье, накь Тимирязеван куьчедай арза атанмазди, месэла гъиле-гъил аваз гьялна. Инсанар вахтунда хабардарна кIанда. Социальный сетра гьи вахтунда, мус, гьи куьче, гьи кIвалер экверикай хкуддатIа малуматар гун чарасуз я. Къвезвай августдизни лап чими йикъар жедайди я», — къейдна А. Абдулмуслимова.
«Россети Северный Кавказ» — «Дагэнерго» ПАО-дин филиалдин кьилин инженер, директордин заместитель Саид Султанова инсанар хабардар авунин кIвалах авайдалай хъсанардайди хиве кьуна.
«Районар, кIвалер экверикай хкудзавай гьалдикай хабардар авунин кIвалах тешкилнава. И малуматар гьакI РД-дин энергетикадин ва тарифрин министерстводиз, ЕДДС-диз ракъурзава. Электросетрин бязи идарайрал гуж акьалтзава ва авариярни арадал къвезва. Абурун ва аварияр арадай акъудунин гьалдикай вахтунда малуматар гуз жезвач. И татугайвал арадай акъудиз алахъда чун. Чна «Дагэнерго-Live» канал арадал гъанва ва ана жуьреба-жуьре малуматар эцигзава», — лагьана С. Султанова.
Регионда энергетикадин къурулушдин умудлувал артухарунин мураддалди «Дагэнергоди» махсус программа уьмуьрдиз кечирмишзава. Гьа программадин бинедаллаз 30 трансформатор дегишарда. 18-июлдалди 20 подстанциядин гужлувал артухарунихъ галаз алакъалу кIвалахар тухванва. 2021-2025-йисара авайбурулай гужлу 99 трансформатор алава яз эцигнава.
Хийир Эмиров
