Алай макъамда интернет галачиз жез­вач­. Гьамиша тахьайтIани, герек атай вах­тунда­­ чна интернетдиз вил язава. Анай лазим къвез­вай малумат, делил, рекъем жа­гъурзава.

И мукьвара интернетдай заз чи хуьруьнви, бине Кьурагь райондин Хпежрин хуьряй тир подполковник, мукьва-кьили Абумуслиман хва Гьажимурадов Гьажимурадакай  руьгь тухардай ихтилатар ийизвай, ам хушдиз рикIел хкизвай инсанрин кхьинар кIелдай мумкинвал хьана. Абурукай са бязибур за инал гъизва.

Геннадий Беседин: «Гьажимурад Абумус­лимович зи лап хъсандиз рикIел алама. Ам 5-отделдин начальник тир. Ам гьар йисуз­ Кеферпатан Кавказдин республикайриз командировкадиз ракъурдай, анрай армиядин­ жергеяр къалинардай жегьилар гъун патал­. Пара­ дугъри, регьимлу, хушдаказ рафтар­валдай, масадаз куьмек гуз кIандай ва спортдал­ рикI алай офицер тир. Подполковникдин чин­да­ аваз ам отставкадиз, цлар эцигдай­ ус­тIар­вилин кIвалахдал фейила чун пара­ мягьтел хьайиди тир. Гьелбетда, за адавай хабар кьунай. Адан жавабди зун мадни тажубарнай: «Заз жуван хсуси кIвал эцигиз кIанзава, гьавиляй къванцин устIарвилин пешени чирзава».

Михаил Меньшов: «Зун адахъ галаз лап мукьувай таниш тир. Гьажимурад Юрий Гагариназ ухшар авай. Къецепатан уьлквейриз командировкадиз фейила, ада санай «Опель» маркадин къацувал квай рангарин автомашин хканай. А вахтунда ахьтин машин садазни авачир. Адаз тамашиз, гарнизондин хейлин инсанар кIватI хьанай».

Михаил Кременский: «Геннадий гьахъ я. Гьажимурада хсуси кIвал Колпашино шегьерда эцигна. Ам ихтибар ийиз, санал разведкадиз физ жедай офицер, гьахълу коман­дир тир. Частуна адаз вирида гьуьрметзавай. Халис дагъви тир — ачух, викIегь, намуслу…».­

РикIи кужумдай гафар адахъ галаз къул­лугъ авур офицерар Алексей Коростина, Виктор Прорвина, Вадим Чернякова, Владимир Виноградовани кхьенва.

Яшар 85-йисалай алатнавай зи хуьруьн­ви алай вахтундани уьмуьрдин юлдаш Галинадихъ галаз Колпашино шегьерда яшамиш жезва. Ам мукьвал-мукьвал Да­гъустандиз стхайрин, мукьва-кьилийрин патав хкведа, санал ял яда. Школа куьтягьна, хуьре чубан­виле, Чиркейдин ГЭС-дин эцигунрал фяле­ви­­ле кIвалахай комсомол Гьажимурадан­ офи­цервилин рехъ 1964-йисуз башламиш­ хьана. Харьковдин радиотехнический, 1973- йисуз инженервилин военный училищеяр куьтягьай ада Украинада, уьлкведин кеферпата къуллугъна, ротадиз регьбервал­ гана­. Винидихъ санал къуллугъ авур офицерди­ ри­кIел хкайвал, Дагъус­тандизни, къунши рес­­публикайризни хквез, призывникрин­ дестеяр­­ армиядин жергейриз тухвана. Военный­ час­тариз къвезвай, адетдин парталар ас­кер­дин­буралди дегишарнавай накьан школьникри­­кай халисан аскерар хьун патал зегьмет чIу­гуна. Намуслувилелди, ватанпересвилелди­ къуллугъ авунай Гьажимурадоваз са шумуд­ медаль ва маса шабагьар ганва. Ватандин ЧIехи дяведин иштиракчи Гьажимурадов Абу­муслиман хцел, жуьрэтлу офицердал хьиз, ам чидай гьар сада дамахзава.

Нариман  Ибрагьимов