19-июлдиз Докъузпара райондин Къурушрин хуьруьн мулкара экстремальный туризмдай нубатдин сеферда “Ярудагъ-2020” фестиваль ачухунин мярекат кьиле фена.
Вирироссиядин фестивалда Москвадай, Краснодардай, Астрахандай ва уьлкведин маса регионрай, гьа жергедай яз Дагъустандин альпинистрин командайрини иштиракда. Саки 90 альпинистди иштиракдай фестиваль 25-июлдалди давам жеда.
Ачухунин мярекатда РД-дин туризмдин ва халкьдин художественный сеняткарвилерин рекьяй министр Р.Ибрагьимова, Докъузпара райондин кьилин везифаяр вахтуналди тамамарзавай А.Агьмедова, меценат М.Абасова, РД-дин альпинизмдин федерациядин председатель П.Леонова, Дагъустандин спортдин туризмдин федерациядин президент Ш.Мурилова ва масабуру иштиракна.
ЧIехи Гъалибвилин 75 йисаз талукьарна фестиваль тешкилайбур РД-дин туризмдин ва халкьдин художественный сеняткарвилерин рекьяй министерство, Докъузпара райондин администрация ва спортдин туризмдин региондин федерация я.
Коронавирусдин тIугъвал чукIунихъ галаз алакъалу яз, алай йисуз къецепатан уьлквейрин альпинистриз фестивалда иштиракдай мумкинвал хьанач.
Фестиваль шад гьалара ачухунин сергьятра аваз Докъузпара райондин медениятдин управленидин къуллугъчийри мугьманриз гегьенш концертни гана. Мярекатдин эхирдай альпинистри Ярудагъдал Гъалибвилин ярж алай пайдах хкажда.
«Лезги газет»
