Дагъустандин экономикадин ва мулкар вилик тухунин министерстводи кIвалах идара ийидай кадрияр гьазурунин Президентдин программадай чирвилер къачун патал пешекарар хкягъунин конкурс давамарзава. Ведомстводин пресс-къуллугъди хабар гузвайвал, документар алай йисан 1-сентябрдалди кьабулда.
“Конкурсда иштиракун патал “Экономика ва управление” хиляй тешкилатри теклифнавай, чпин яшар 50 йисалай гзаф тушир, кьилин образование, 5 йисалай тIимил тушиз кIвалахдин тежриба авай, идара ийидай куллугъдал 2 йисалай тIимил тушиз кIвалахнавай, хъсан гележег авай руководителриз теклифзава”, — хабар гузва малуматда.
Президентдин программадай чирвилер къачуник экечIун патал документар ракъурун, конкурсдин имтигьандай экъечIун лазим я. Дагъустандин сергьятра а программа кьилиз акъудунин карда республикадин гьукуматдин халкьдин майишатдин университетди иштиракзава. Ана иштиракун патал, программайрин сиягьдай “Подготовка 2020-2021” хкяна, информациядин Modeus системада регистрация хьун ва вири документар РД-дин экономикадин ва мулкар вилик тухунин министерстводив агакьарун чарасуз я.
Конкурсдиз талукь гегьенш малуматар РД-дин экономикадин ва мулкар вилик тухунин министерстводин сайтдин “Программа подготовки управленческих кадров” паюнай жагъуриз жеда.
«Лезги газет»
