Дагъустандин тIебиатдин ресурсрин ва экологиядин министерстводи Урусатдин ботаникадин обществодин региондин отделенидихъ галаз санал Дагъустандин мулкара авай гьайванрикай, набататрикай цIийи делилар кIватIнава ва абур цIийиз чапдай ахкъуддай Яру ктабдик кухтун теклифнава.
ТIвар кьунвай министерстводин пресс-къуллугъдин делилралди, 2019-йисуз тухвай ахтармишунрин нетижайрал асаслу яз, Яру ктабдик кухтуна ва адакай хкуд хъувуна кIани гьайванринни набататрин тIварарин сиягь туькIуьрнава. Кьилди къачуртIа, цIийи хъийидай Яру ктабдиз 281 набатат ва 182 гьайван алава хъжеда. Идахъ галаз сад хьиз, икьван чIавалди Яру ктабда хьайи са жерге набататрин, гьайванрин тIварар анай ахкъудун къарардиз къачунва. Эхиримжи йисара чпин кьадар тIебиатда артух хъхьанвайвиляй 8 жуьре набатат ва 48 гьайван Яру ктабдин сиягьда амукьдач.
Къейд ийин, къанундал асаслу яз, Яру ктаб цIуд йисан къене са сефердилай тIимил тушиз цIийи кьилелай чап хъийизва.
«Лезги газет»