Бажарагъдин бегьерар
Сулейман-Стальский райондин кьил Нариман Абдулмуталибова и йикъара райадминистрациядин культурадин отделдин начальникдин заместитель, халкьдин ва эстрададин манияр тамамарзавай Дагъустан Республикадин лайихлу артист Омар Меликовав шад гьалара гьуьрметдин грамота вахкана. Райондин виридалайни чIехи шабагьдиз О.Меликов “лезгийрин милли музыкадин искусство вилик тухуник еке пай кутунай, райондин культурадин ва общественный уьмуьрда активвилелди иштиракунай ва 50 йис тамам хьунихъ галаз алакъалу яз” лайихлу хьана.
ТIебиатди кьетIен пай, бажарагъ ганвай манидар ва культработник яз, Омар Меликов неинки са чи районда, гьакI адалай къецени гзафбуруз фадлай таниш я. Бажарагъ виридаз гузвай пай туш. Гьар нивай хьайитIани шиирар теснифиз, манияр лугьуз, суьретдал чан гъиз жедач. Ибур анжах чпихъ акьалтIай алакьунар авайбурун тIем акакьдай крар я. Ам, лежберди никIе цанвай къуьлуьн твар хьиз, фараш жезва ва, са кьадар вахт алатайла, ада бегьер гузва.
— Жув-жуваз чир хьайи вахтарилай зи сивел мани хьайиди я, — лугьузва О.Меликова. — Гьеле гъвечIи аял яз, зун чIехи дидедини бубади, хкажна, столдал акъвазардай ва зав манияр лугьуз тадай. “Зи хцикай артист-манидар жедайди я”, — чIехи дидеди лугьуз хьайи и гафар зи бейнидай къени акъатзавач.
Омар Меликов 1971-йисуз къадим Дербент шегьерда ГОВД-дин участковый, винистIалви Асланан ва шегьердин гамарин фабрикада кIвалахзавай халичайрин устад Шаперидин хизанда дидедиз хьана. Хизанда 5 велед авай. Омара 9-класс Дербентда, 10-класс Вини СтIалрин юкьван школада акьалтIарна.
Манияр гадади гьеле школада кIелзавай йисарилай лугьузвай. 10-классда кIелзавайла, Омар Меликова республикада машгьур “Беневша” ансамблда манияр лугьудайди — солист язни культурадин ва шадвилин мярекатра иштиракзавай.
Новочеркасск шегьерда политехнический институтда кIелзавай Омар армиядин жергейриз тухвана. Армиядилай гуьгъуьниз ада и институт акьалтIарна. 1991-йисуз ам Кьулан СтIалрин хуьруьн культурадин кIвале кIвалахал акъвазна, гьа са вахтунда ада “Беневша” ВИА-дин кIвалахдани иштиракун давамарна.
Жегьил пешекардин патай милли культурадиз, искусстводиз авай майилвал екеди тир. И рекьерай виликди камар къачун, “хъутIалар” муьтIуьгъарун патал махсус чирвилерни герек тир. И кар аннамишуналди, Омар Меликова Дербент шегьердин культурадин институтни (заочно) акьалтIарна.
Къвез-къвез “Беневша” ансамблдин тIвар Дагъларин уьлкведа сейли ва машгьур хьана. Виниз тир устадвилиз ва алакьунриз килигна, 2006-йисуз “Беневша” ВИА-диз “Халкьдин коллектив” ва Омар Меликоваз “Дагъустан Республикадин лайихлу артист” лагьай тIварар гана.
— За Омар Меликовахъ галаз санал яратмишунрин рекье кIвалахиз гзаф йисар я, — лугьузва республикада машгьур культработник ва конферансье Ярагьмед Ярагьмедова. — КIантIа Кьасумхуьр, Дербент, кIантIа Махачкъала ва я маса чка хьурай, концертдин нубатдин нумра малумардайла, Омар Меликован тIвар кьунмазди, тамашачияр кIвачел къарагъда, гурлу капар яда. Зун гзаф сеферра шагьид хьана хьи, Омар Меликован тIвар неинки лезгияр, гьакIни маса миллетрин векилар яшамиш жезвай шегьерра, районрани сейли я. Гьакъикъатдани, кьетIен устадвал, бажарагъ, гуьзел сес ава чи стхадихъ. Адал чна гьахълудаказ дамахзава.
Омар Меликоваз неинки чи республикада, гьакIни Дондал алай Ростовда, Ставрополда, Краснодарда, Москвада ва масанрани гурлу капар яна. Ам международный “Рехи Каспий”, республикадин “Лезгистандин авазар”, “Шалбуздагъдин авазар ва манияр” ва маса фестивалрин лауреат я. “Махачкъаладин югъ”, “Шарвилидин сувар”, “СтIал Сулейманан шииратдин йикъар”, “Дербентдин къеледин йикъар” культурадинни шадвилин маса мярекатрани гьар йисуз Омар Меликова активвилелди иштиракзава.
Са шумуд йисуз адакай Москвада кьиле тухузвай Яран суварин иштиракчи хьана. Идалайни гъейри, уьлкведин меркезда яшамиш жезвай чи ватанэгьлийрин тIалабунриз килигна, Омар Меликова “Беневша” ВИА-дихъ галаз санал сольный (текдиз сада мани лугьудай) 8 концерт гана.
— Етим Эминан, Забит Ризванован чIалариз Мегьамед Гьуьсейнова, Маина Абдулмуталибовади кхьенвай манияр тамамарун заз иллаки хуш я, — лугьузва О. Меликова. — Мадни зи репертуарда Сажидин Саидгьасанован, Майрудин Бабаханован ва алай аямдин маса шаиррин маниярни ава.
Бажарагълу манидарди гьа са вахтунда вичини шиирар кхьизва, музыка теснифзава, абур тамамарни ийизва. Абурун кьадар 30-дав агакьзава.
2008-йисалай инихъ Омар Аслановича Сулейман-Стальский райадминистрациядин культурадин отделдин начальникдин заместителвилин къуллугъни намуслудаказ кьилиз акъудзава.
— Омар Асланович чпиз Аллагьди, тIебиатди кьетIен пай, бажарагъ ганвай инсанрин жергедик акатзава, — лагьана чаз культурадин отделдин начальник, Дагъустандин халкьдин шаир Майрудин Бабаханова. — Халкьдин къуллугъда акъвазнавай, милли культура, искусство вилик тухуник пай кутазвай инсанар гьар са хуьруьн, райондин дамах я. Омар Меликовакай рахадайла, Инсан, Культработник, Манидар гафар чIехи гьарфарилай кхьиниз лайихлу я.
Жуваз фадлай ва мукьувай хъсандиз таниш, чизвай кас яз, О.Меликовакай макъала кхьидай фикир заз виликдайни авай. Амма ада разивал гузвачир.
Омар Асланович чаз гьамиша кIвалахдин къайгъуйра, культурадинни шадвилин мярекатра иштиракиз аквада. Уьмуьрдин 50-гатфар мубарак авуналди, чаз Омар Ме-ликовахъ чандин мягькем сагъвал, хизанда хушбахтлувал, яратмишунрин ва искусстводин рекье мадни еке агалкьунар хьана кIанзава.
Хазран Кьасумов,
РФ-дин журналистрин Союздин член
