Дагъустанда гьасилзавай лапагрин як гила “Магнит” тIвар алай туьквенрин дезгейрал пайда жеда. Идаз талукь икьрар Дагъустандин гьукуматди и йикъара кутIуннава.
Инал къейд ийин, “Магнит” — им, туьквенрин кьадардал ва абур авай чкайрал гьалтайла, Россиядин недай суьрсет куракура маса гунал машгъул туьквенрин виридалайни зурба сеть я. Компаниядин туьквенар уьлкведин 3 800 чкада ава, анриз, санлай къачурла, 13 миллион кас къвезва.
Алишверишдин сеть лапагрин такьанвай як гьам алажай жендекралди, гьамни гьялнавай гьалда аваз къачуз гьазур я. ГьакIни “Магнит” туьквенрин дезгейрилай республикада гьазурзавай кIепI, дагъдин чаяр ва са жерге маса суьрсет маса гунин гьакъиндай рахунар кьиле тухузва. Талукь тир икьраррал къулар и мукьвара чIугвадайвал я.
РикIел хкин, “Дагъустандин лапагдин як” бренд 2020-йисуз кьиле тухвай регионрин машгьур недай продуктрин “Россиядин тIямар” 1-милли конкурсда гъалиб хьанай. Гила ам чи ва къецепатан уьлквейрин мулкунал активнидаказ маса гузва. Малум тирвал, тIебии шартIара, дагъдин яйлахра куьчери къайдада хуьзвай, михьи булахрин цел чIехи жезвай чи республикадин лапагрин якIун дад амайбурулай са кьадардин тафаватлу я. Яйлахрин жуьреба-жуьре набататрикай ибарат векь незвай и якIук инсандин сагъламвал патал кфетлу шейэр гзаф ква. Адакай лапагдин якIуз хас ни къведач. ЯкIун ягълувални тIимил я.
«Лезги газет»