Докъузпара райондиз РД-дин туризмдин ва халкьдин художественный сеняткарвилерин рекьяй министрдин везифаяр вахтуналди тамамарзавай Эмин Мерданов фена. Ада Докъузпара райондин администрациядин кьил Мегьамед Шамиловахъ галаз ДАССР-дин 100 йисан юбилейдиз талукьарна тухузвай “Яру дагъ — 2021” фестиваль ачухунин карда иштиракна.
Туризмдихъ галаз алакъалу и фестиваль гьар йисуз Докъузпара райондин Къурушрин хуьруьн патарив, Яру дагъ, Шалбуз дагъ ва Базардуьзуь дагъларин ценерив тухузва.
Туризмдин экстремальный жуьрейрин фестиваль РД-дин туризмдин ва халкьдин художественный сеняткарвилерин министерстводин, РД-дин “Туризмдин “Дагъустан” информациядин центр” ГБУ-дин, Докъузпара райондин администрациядин, Россиядин МЧС-дин ДПСО-дин ва РД-дин спортдин туризмдин Федерациядин куьмекни галаз тешкилнава.
Мегьамед Шамиловани Эмин Мерданова Докъузпара районда туризм вилик тухунин гьакъиндай веревирдер авуна. Муниципалитетдин регьберди къейд авурвал, Докъузпара райондихъ тIебиатдин кьетIен мумкинвилер ава. Инин мулкар туристри итиж ийидай пара гуьрчег, надир чкайралди девлетлу я.
— Ихьтин мумкинвилерикай менфят къачун патал районда туризм вилик тухудай вири жуьредин шартIар тешкилун лазим я. Инфраструктурадин проектар уьмуьрдиз кечирмишунин мураддалди чна федеральный ва республикадин программайрани иштиракда. Коммерциядин проектар кьилиз акъудун патал, са рахунни алач, и хилез хъсан инвестицияр желб авун герек къведа, — лагьана М.Шамилова.
«Лезги газет»
