РД-дин Кьилин везифаяр вахтуналди тамамарзавай Сергей Меликован регьбервилик кваз Махачкъалада суьрсетдин ва суьрсетдинбур тушир шейэрин (метягьрин) къиметар дегишар тавунин месэладиз талукьарнавай совещание кьиле фена.
Региондин регьберди малумарна хьи, мукьвал йикъара, “Сад тир Россия” партияди кьил кутуна, видеоконференциядин къайдада вири регионрихъ галаз совещание тешкилна. Анал кура-кура ва санлай гзаф кьадар маса гудай (тупунин) алишверишдин къиметар арадал гъуникайни месэла кватна. Лугьун лазим я хьи, суьрсетдин ва суьрсетдинбур тушир са бязи шейэрин къиметар хкаж хьуни агьалийрик секинсузвал кутунва. Идан гьакъиндай талукь идарайриз арзаярни гзаф ийизва.
С.Меликова къейд авурвал, уьлкведин маса регионрив гекъигайла, Дагъустанда недай-хъвадай продуктрин къиметар агъузбур я. Гьакъикъат икI тирди РФ-дин Гьукуматдини, карчивилин сообществодин, Россиядин халкьдин фронтдин векилрини тестикьарзава. Базарра суьрсетдин къиметар ужузбур ятIани, туьквенра гьа шейэр хейлин багьаз маса гузва.
Республикада недай-хъвадай шейэрин къиметрин гьакъиндай доклад хуьруьн майишатдин ва суьрсетдин министр Баттал Батталова авуна. Адан гафаралди, 2021-йисан апрелдилай республикадин базарра майвайрин къиметар хкаж хьана. Имни алатай йисуз республикада ва гьакI уьлкведани гьасилзавай майвайрин кьадар тIимил хьунихъ галаз алакъалу я.
Батталова хабар гайивал, республикада суьрсетдин къиметар пайгардик кутунин мураддалди майваяр, емишар ва маса суьрсет гьасилзавай майданар артухарда. Идахъ галаз сад хьиз 2021-йисуз майваяр битмишарунал машгъул ксариз са гектардай 25 агъзур манат субсидияр гудай къарарни кьабулнава. Базарра, туьквенра майвайрин, емишрин ва суьрсетдин къиметар ужузардай са рехъ мад ава. Амни шегьерра хуьруьн майишатдин ярмаркаяр тешкилун я.
Суьрсетдинбур тушир метягьрин къиметриз талукь яз РД-дин промышленностдин ва алишверишдин министр Низам Халилова къейд авурвал, гьелелиг къиметар хкаж хьунин месэла авач. Алай йисан июлдин сифте кьилера анжах гигиенадиз талукь шейэрин ва са бязи суьрсетдинбур тушир затIарин къиметар са тIимил хкаж хьана.
РД-дин эцигунрин министр Артур Сулейманова лагьайвал, регионда эцигунардай материалрин къиметар хкаж хьанва. Имни алай йисуз республикада эцигунрин кIвалахар артух хьунихъ галаз алакъалу я. УФАС-дин регьбер Каир Бабаева къейд авурвал, алай вахтунда Дагъустанда эцигунрин кIвалахар кьиле тухузвай 1,3 агъзур организация ава.
Совещанидин нетижаяр кьуналди, РД-дин регьберди июлдин эхирдалди къиметриз талукь оперативный штабдин цIийи къурулуш арадал гъунин тапшуругъ гана. Оперштабдиз РД-дин Гьукуматдин Председатель Абдулпатагь Амирханова регьбервал гуда. Оперштабдин заседаниярни гьар вацра кьиле тухудайвал я. Анрал суьрсетдин, промышленностдин, эцигунрин метягьрин ва маса къуллугърин къиметар арадал атунин, тайинарунин месэлайриз килигда. Сергей Меликова гьакIни алай вацран эхирдалди шегьерра хуьруьн майишатдин ярмаркаяр тешкилуниз талукь график туькIуьрунин гьакъиндайни тапшуругъ гана.
«Лезги газет»
