7-апрелдиз Дагъустандин жемиятдин уьмуьрда лишанлу вакъиа хьана: Дагъустандин Огни шегьерда дагъвийрин руьгьдин буба, Дагъларин уьлкведин ва Чечнядин имамрин муаллим, Кавказда муьридизмдин бине кутур чIехи алим Ярагъ Мегьамедан тIварунихъ галай медреса ачухна.
И мярекатдиз республикадин кьуд патай мугьманар атанвай. Абурун арада Дагъустандин Муфтий, республикадин диндин алимрин Советдин председатель, шейх Агьмад Афанди, РД-дин милли сиясатдин ва диндин крарин рекьяй министр Энрик Муслимов, ЮТО-да РД-дин Кьилин патай тамам ихтияр ганвай векил Фуад Шихиев, са жерге районрин администрацийрин кьилер, диндин машгьур деятелар, сиясатдин, жемиятдин векилар ва масабур авай.
Мярекат кьиле тухузвай РД-дин Муфтиятдин образованидин ва илимдин департаментдин регьберди кардик акатзавай идарадикай фикирар лугьун патал сад-садан гъуьгъуьналлаз мугьманриз сегьнедиз теклифна.
Вичин рахунра шейх Агьмад Афандиди къейдна:
— Ярагъ Мегьамед и дуьньядай хъфейдалай инихъ 180 йис алатнава. Амма акI я хьи, чIехи шейх къени чи арада ава. Чаз, дагъустанвийриз, адакай рахун гьамиша гзаф хуш кар я.
Ватанпересвиликай рахадайла, заз лугьуз кIанзава хьи, эгер вири уьлкведа тек 10 ватанперес аваз хьайитIа, абурукай сад зун жеда. За и кардал дамахзавач, анжах Аллагьдиз шукур ийизва.
Тарих чирзавай алимрин делилралди, Урусатдиз мусурманрин дин Дагъустандай атана. Дагъларин уьлкведиз лагьайтIа, Ислам Кьиблепатан Дагъустандай чкIана. За Аллагьдивай чи чилел берекатар артух ва тасаввуф (Исламдин са хел) вири Урусатда машгьур хьун тIалабзава…”, — лагьана Муфтийди, виридаз цIийи медреса кардик акатун мубарак авуналди.
РД-дин милли сиясатдин ва диндин крарин рекьяй министр Энрик Муслимова, Кьиблепатан Дагъустанда медреса ачухунихъ авай важиблувал къейд авуналди, РД-дин Муфтиятдин векилри дагъустанвийрин арада садвал, абур руьгьдин жигьетдай медени, савадлу хьун патал кьиле тухузвай кIвалахрикай суьгьбетна. Министрди гьакIни гележегда медресада чирвилер къачудайбурун тIварцIихъни хуш келимаяр лагьана.
Гуьгъуьнлай мярекатдал рахайбуру диндин образование вилик тухунихъ авай метлебдикай, ахлакьдикай, эдебдикай чпин фикирар раижна, Кьиблепатан Дагъустандин агьалийриз цIийи медреса мубаракна. Мегьарамдхуьруьн райондин имамрин советдин председатель Агьмед Мегьамедова Ярагъ Мегьамедан уьмуьрдин рекьикай гегьеншдиз суьгьбетна.
Диндин межлисдал нашидар, пак Къуръан кIелна. Эхирдай мугьманриз медресада сиягьат тешкилна.
“Лезги газетдиз” РД-дин Муфтиятдин пресс-къуллугъди хабар гайивал, Дагъустандин Огнида ахъайнавай Ярагъ Мегьамедан тIварунихъ галай медресадихъ государстводин лицензия ава ва ада алай аямдин вири истемишунриз жаваб гузва.
Дашдемир Шерифалиев
