Алатай гьафтедин хемис югъ Мегьарамдхуьруьн райондин Советский хуьруьн мектеб патал адетдинди тушир. И юкъуз ина лезгийрин къадим заманайрин зурба ашукь ва шаир Ялцугъ Эминан 320, советрин литературадин классикрикай сад яз гьисабзавай Насруллагь Нуридин 110 йис тамам хьуниз талукьарнавай шииратдин межлис кьиле фена. Хуьруьн администрация, мектебдин муаллимрин коллектив, кIелзавай аялар и лишанлу мярекатдиз виликамаз гьазур хьанвай: актовый залда, дегьлизра шаиррин уьмуьрдиз ва яратмишунрин рекьиз талукьарнавай махсус стендар эцигнавай, ктабрин выставкаяр тешкилнавай…
ЧIехи шаиррин юбилейриз бахшнавай мярекатда “Лезги газетдин” кьилин редактор Мегьамед Ибрагьимова, сетдин “Lezgigazet.ru” изданидин мухбир, шаир, таржумачи Мурад Саидова, Насруллагь Нуридин хва, шаир Майил Эфендиева, Мегьарамдхуьруьн райондин администрациядин культурадин управленидин начальник Эседуллагь Селимова, Сулейман-Стальский райондай атанвай шаирар тир Сажидин Саидгьасановани Агьмедпаша Агьмедпашаева, хъукьвави шаир Демирбег Эмирбегова, Советский хуьруьн администрациядин кьил Эмирагъа Асварова, муаллимри, хуьруьн жемятди иштиракна.
Шииратдин межлис лезги чIалан муаллим Диана Загьировади ачухна ва кьилени тухвана. Ялцугъ Эминан уьмуьрдикайни яратмишунрин рекьикай лезги чIаланни литературадин муаллим Сулейман Пашаева, Насруллагь Нуридикай Майил Эфендиева гегьенш докладар авуна. Мярекатдин кьетIенвиликай, лезги шаиррин яратмишунар мектебра чируникай акьалтзавай несилар тербияламишунин карда авай метлебдикай Советский хуьруьн мектебдин директор Агъахан Маметова лагьана.
Вичин рахунра “Лезги газетдин” кьилин редактор Мегьамед Ибрагьимова иштиракчийрин фикир акьалтзавай несилдин векилар къвердавай руьгьдин ивирривай къерех жезвайвилин месэладал желбна. “Мектебра кIелзавай гзаф аялриз тарихда зурба лайихлувилер къалурнавай чи милли дестекрикай – Гьажи Давудакай, Ярагъ Мегьамедакай, Ялцугъ Эминакай ва масабурукай чизвач. Гьа са вахтунда абуруз чи йикъара машгьур хьанвай спортдин пагьливанрин, эстрададин “гъетерин” уьмуьрдин гьар са легьзе чизва лагьайтIа, зун гъалатI жедач. И карди чи гележег – акьалтзавай несилдин векилар руьгьдин дестекривай къакъатзавайди къалурзава. Чун гиламаз и месэладин къайгъуда хьана кIанда. Къе кьиле физвай мярекатди жаванар, жегьилар, чун вири чи милли чешмейриз мукьва ийизва. Абур пара тухуниз кьетIен фикир гана кIанда…”, — къейдна ада.
Межлисдин сергьятра аваз рахай, хейлин йисара “Лезги газетдихъ” галаз амадагвилин алакъаяр хвейи мухбир, муаллим Ферид Вагьабова Ялцугъ Эминан ирс хуьнихъ чи эдебият патал еке важиблувал авайдакай лагьана. Адан гафарай малум хьайивал, са шумуд цIуд йис идалай вилик ада Ялцугъ Эминан яратмишунрин гъилин хатIарин дафтар машгьур алим Гъалиб Садыкъидив вуганай. Алимди дафтар элкъвена вахкуда лагьана гаф ганайтIани, Ферид Вагьабовав ам ахгакьнач. Ада мярекатда иштиракзавай Мегьамед Ибрагьимовавай, Сажидин Саидгьасановавай а дафтар суракь хъувун ва винел ахкъудун тIалабна. Ада гьакIни къейд авурвал, Ялцугъ Эминан яратмишунрин гъилин хатIарин дафтарар мадни авай, амма абурун кьисметдикай адаз малум туш.
Шииратдин межлисдал сад-садан гъуьгъуьналлаз шаирар, муаллимар, Мегьарамдхуьруьн райондин администрациядин культурадин управленидин начальник Эседуллагь Селимов, хуьруьн администрациядин кьил Эмирагъа Асваров рахана, шиирар кIелна. Агьмедпаша Агьмедпашаева машгьур манидар Рустам Къарибовав медениятдин “Куьредин ярар” тешкилатдин патай Гьуьрметдин грамота вахкана.
Советский хуьруьн мектебда чирвилер къачузвай аялри кIелай шиирар, тамамарай манияр, сегьнеламишай пердеяр мярекатдин иштиракчийри хушдаказ кьабулна. Музыкадин устадар тир ашукь Айдуна, Рустам Къарибова, муаллим Эсфира Хаспулатовади ва чIагъанчи Шакир Магьарамова мярекат мадни гурлу авуна.
Агьмед Магьмудов
