Райцентрадикай яргъал хуьруьн чкада фельдшервилинни акушервилин пункт (ФАП), шаксуз, здравоохраненидин кьетIен идара я. Азарлудав сифте нубатда фельдшер агакьзава эхир. Пара вахтара абурун чирвилеринни пешекарвилин тежрибадилай азарлудан кьисмет аслу жезва. Гьакъикъатда хуьруьн фельдшер инсандин руьгьни, беденни сагъардай хъсан духтур я: рабни яда, массажни ийида, дарманни гуда, бедбахтвилин дуьшуьшра сифте куьмекни агакьарда… Агьалийрин диспансеризациядин, медпрофилактикадин ва азарлуйрал гуьзчивал тухунин вири серенжемрани хуьруьн фельдшердин везифа-роль важиблуди я. Вири и крар намуслудаказ кьиле тухун патал суварин ва ял ядай йикъарани кIвалахун адан уьмуьрдин манадиз элкъвена кIанда.
Разивилелди къейд ийин, гьахьтин пешекар я къе Ахцегь райондин Ялахърин хуьруьн ФАП-дин фельдшер Мегьамедова Багьаханум Ибрагьимовна. ТIал-квал алудиз вичин патав къвезвай гьар са кас рази ийиз алакьзавай ам хуьре лап гьуьрметлу ксарикай сад я. Медицинадин хиле адан пешекарвилин гьакъисагъ зегьметдин рехъ 1993-йисуз медучилище куьтягьна, Тверь шегьердин больницада кIвалахунилай башламиш хьана. Са йисуз шегьердин хирургиядин отделенидин медсестравал авур луткунви руш ялахъви Жамал Мегьамедоваз гъуьлуьз финикди (алай вахтунда Жамал хайи хуьруьн умуми чирвилерин школадин директор я) жегьил хизан дагъдин хуьруьз хтана. Гила дуьз 29 йис я (умуми стаж – 30 йис) ам ялахъвийрин сагъламвилин къуллугъда намуслувилелди акъвазна.
1-сентябрдиз, Чирвилерин юкъуз, Ялахърин хуьруьн школадин сад лагьай зенгинин мярекатда иштиракун патал фенваз (ихтилат кватай чкадал лугьун, цIи и школа, саки 5 млн манат серфуналди, капитальнидаказ ремонтнава ва кIелунин алатралди тадаракламишнава), патав гвай ФАП-дални кьил чIугуна.
– 2021-йисуз хуьре девирдин истемишунрив кьурвал тадаракламишнавай цIийи ФАП эцигайдалай кьулухъ, гьелбетда, кIвалахдин шартIар хъсан я, – ихтилатзава анин заведующий — фельдшер Багьаханум Ибрагьимовнади. – Аквазва хьи, инаг герек тир вири тадаракралдини алатралди таъмин я. Азарлуйриз сифтегьан куьмекдин дарманарни ава. Герек атай чIавуз ЦРБ-дин ва хуьруьн администрациядин патайни ваъ авач, мумкин тир куьмекар гузва. Пара сагърай чеб!
Багьаханум вахахъ галаз авур суьгьбетдай малум хьайивал, хуьре агьалийрин кьадар къвердавай тIимил жезва.
– Эхиримжи вахтунда чи хуьр, гьайиф хьи, жегьилар шегьеррихъ алатиз, къвердавай зайиф жезва. Вири 120 кас я амайди. Абурукай аялар – 16. Жемятдин сагъламвилин гьал хъсан я, садакай-садак акатдай азарар авач. Сифтегьан чарасуз куьмекдин дарманралди таъмин я, – ада махсус холодильник ачухна къалурзава. – Анжах са кар ава: бязибуруз чавай, месела, «предуктал» ва чаз ахъай тийизвай маса дарманарни кIанзава. Гьар са дарман чаз ахъайиз, аваз хьайитIа, хъсан я, гьелбетда. Хуьруьн чкада вири жезвач эхир.
Къуй вири сагълам ва сагъ-саламат хьурай!
Дашдемир Шерифалиев
