Алай вахтунда Сербиядин Белград шегьерда азаддиз кьуршахар кьунай кьиле физвай дуьньядин чемпионатда (ам 24-сентябрдиз акьалтIда) вичин ери-бине Кьурагь райондин Кьуьчхуьрай тир белижви Шамиль Мамедова 65 кг-дин заланвал авайбурун арада азаддаказ кьуршахар кьунай буьруьнждин медаль ва Парижда къведай йисуз кьиле фидай Олимпиададин къугъунрин путёвка къазанмишна. Мубаракрай!

Ярумчух финалдиз акъатдалди 3 бягьсни (абурукай 2 вахт амаз) инанмишвилелди акьалтIарай чи ватанэгьли Исмаил Мусукаеваз 5:4 гьисабдалди кумукьна. Амма Шамиль руьгьдай аватнач. ИкI, буьруьнждин медаль патал иранви Рагьман Амузадхалилидихъ галаз ада кьиле тухвай бягьс 8:6 гьисабдалди акьалтIна.

РикIел хкин, Ш.Мамедов Россиядин, международный классдин спортдин мастер, 2021-йисуз жаванрин арада Россиядин ва дуьньядин кIвенкIвечивал патал акъажунрин, 2022-2023-йисара Иван Ярыгинан Гран-придин, Туьркияда кьиле фейи международный «Яшар Догу-2022» турнирдин, Вирироссиядин спартакиададин (2022-йис) ва цIи Каспийск шегьерда кьиле фейи Россиядин чемпионатдин гъалибчи я (адакай гегьенш макъала чна газетдин гуьгъуьнин нумрада чапда).

Рагнеда Рамалданова