14-июлдиз РД-дин милли сиясатдин ва динрин крарин рекьяй министр Энрик Селимова республикадин СМИ-рин кьилин редакторрихъ галаз гуьруьш кьиле тухвана. Мярекатда министрдин сад лагьай заместитель Гьарун Давидова, РД-дин информациядин ва печатдин Агентстводин кьилин замес­титель Наида Мегьамедовади, РД-дин журналистрин Союздин председатель­ Мегьамед Ибрагьимова, РД-дин «Да­гъустан» Этномедиахолдинг» ГБУ-дин регьбердин везифаяр вахтуналди тамамарзавай Арсен Юсупова ва масабуру иштиракна. Абуру регионда жезвай вакъиайрикай агьалийрал жезмай кьван фад якъин, дуьз малуматар­ агакьарун патал алава гьихьтин серенже­мар кьабулиз жедатIа ва миллет­рин, жуьреба-жуьре динрал амалзавайбу­рун арада дуствилин, стхавилин­ ала­къаяр хуьниз талукь месэлаяр СМИ-ра ачухарзавай гьалар веревирдна.

Энрик Муслимова къейд авурвал, веревирдзавай месэлаяр государстводин милли сиясатдик акатзавайбур я. Кьиле физвай вакъиайрин жигьетдай инсанрал  гьакъикъатдихъ галаз кьазвай малуматар агакьарунилай жемиятда дурумлу гьалар хуьн аслу я.

«Чун къе Урусатдиз, кьилди къачуртIа, Дагъустандиз, акси яз тухузвай информациядин дяведин шагьидар я. Алатай йисан сентябрдин вацра Киевдин кьилиз атанвай миллетчияр, еке пулар харжна, телеграм-каналрин куьмекдалди чи рес­публикада гьалар пайгардикай хкудиз алахъайди виридан рикIел алама. Амма абурун ниятар тIач хьана, сифте нубатда чкадин СМИ-ри, энгел тавуна, дагъустанвийрив агакьарай якъин малуматар себеб яз. Тапарралди, гьиллейралди садавайни секин, ислягь жемиятдик гъулгъула кутаз жедач, вучиз лагьайтIа, чи респуб­лика миллетрин, жуьреба-жуьре динрал амалзавайбурун арада стхавилин мягькем бинейрал акъвазнава. Чи виридан умуми везифа и бине мадни мягькемарун я», — къейдна Энрик Муслимова.

Гуьруьшдал ватанпересвилин, эдебдинни ахлакьдин тербиядиз талукь мес­э­­лаярни веревирдна. «Лезги газетдин» кьилин редактор Мегьамед Ибрагьимова­ хабар гайивал, республикадин вири­ газетра, журналра, ТВ-да и месэлайриз­ кье­тIен фикир гузва. «Кьилди жува регь­бервал гузвай «Лезги газетдикай» ра­хай­тIа, ватанпересвилин, ахлакьдин тербия­дин месэлайриз газетдин чинрал да­тIана асул чка гузва, кIелзавайбуруз и темайрай хъсан, чранвай макъалаяр тек­лифзава. Гзаф дуьшуьш­ра ахьтин макъа­лайрин ав­торар акьалтзавай несилдихъ галаз кIвалахзавай муаллимар, алимар жезва­. Са акьван секин тушир, чалпачух квай алай девирда ватанпересвилин, ахлакьдин темаяр сифте чкадал хьун герек я», — лагьана ада.

Агьмед Магьмудов