13-июлдиз региондин Кьил Сергей Меликова Дагъустанда мектебар эцигунин ва ремонт авунин кIвалахар 1-сентябрдалди тамамдаказ акьалтIарунин месэладай совещание кьиле тухвана. Ам Россиядин просвещенидин министрдин заместитель Андрей Николаеван ва идарадин къурулушар еримлу авунин Департаментдин директор Ирина Шварцманан иштираквал аваз кьиле фена.
Совещанидал Дагъустанда мектебар ва аялрин бахчаяр эцигунин, гьакIни 2022-йисуз эцигнавай образованидин объектриз лицензияр гунин месэлаяр веревирдна. Абурукай рахадайла, Сергей Меликова къейд авурвал, Дагъустанда образованидин 50-дав агакьна объектар гьазурлухвилин гьар жуьредин дережайра ава ва абур тайинарнавай вахтунда ишлемишиз вахкун важиблу я.
«Чна кIвалахар кьиле физвай гьалдал датIана гуьзчивалзава. Пландин бинедаллаз, и объектар 2023-йисан эхирдалди ишлемишиз вахкун лазим я, амма и карда жуьреба-жуьре манийвилерни гьалтзава. Асул гьисабдай абур тамамарнавай кIвалахрин актар ва гьахъ-гьисабдин чарар дуьздаказ ацIур тавунихъ галаз алакъалу я. Алай йисуз авай нукьсанар арадай акъудун ва цIийи тарих кхьиз башламишун лазим я. Чаз дуьз рекъемар ва авай гьалдин гьакъиндай якъинвал герек я», — лагьана региондин регьберди.
РД-дин эцигунрин, архитектурадин ва ЖКХ-дин министр Артур Сулейманован докладдай малум хьайивал, 2023-йисуз Дагъустанда 40 мектеб ва аялрин 11 бахча ишлемишиз вахкуда.
«Демография» ва «Образование» милли проектрин сергьятра аваз 2023-йисуз образованидин 65 объектдин проектар гьазурун ва эцигунрин кIвалахар кьиле тухун пландик кутунва. Кьилди къачуртIа, иник 22 778 аялдиз чкаяр жедай 54 мектеб ва 1 550 аялдиз чкаяр жедай 11 бахча акатзава. Санлай къачурла, вири объектрал кIвалахар кьиле тухузва ва абур авай гьалдал разивал ийиз жеда. Бязи объектрал кIвалахар планда къалурнавай вахтунилай фад тамамарнава. РикIел хкин, проектар кьилиз акъудиз башламишай вахтунилай инихъ республикада цIийи 77 мектеб ва аялрин бахча пайда хьана.
Совещанидал кьилди къачур гьар са объект авай гьал веревирдна. Эцигунрин кIвалахдин жигьетдай гьалар са акьван хъсанзавачир са жерге мектебар региондин Кьили кьетIен гуьзчивилик кутуна.
Идалайни гъейри, Сергей Меликова Хасавюрт райондин Октябрьский хуьруьн школадиз талукь яз арадал атанвай гьаларикай лагьана. Идалай вилик и хуьруьн агьалийри региондин Кьиливай чкадин мектеб авай гьалдиз фикир гун тIалабнай. Идарадин гьеле 1970-йисуз эцигнавай дарамат чкIидай гьалда ава. Мектебда тахминан 400 аялди кIелзава. Хуьруьн жемятдин гафаралди, диде-бубайриз лап усал гьалда авай дараматда кIелзавай чпин аялар мусибатдик акатунихъай кичIезва.
Сергей Меликова месэладал машгъул тир вице-премьердал ва талукь министерстводал арадал атанвай гьалдай тади гьалда кьил акъудун тапшурмишна.
Чи мухбир
