КIела, чира
Адет яз, лезгийри еврейриз ва иудейриз чувудар лугьузва (урус ва лезги чIаларин са бязи словаррани и гафар гьа и къайдада таржума авунва). Амма икI таржума авун, асул гьисабдай, дуьз къвезвач.
Гзафбуруз, чувудар (евреяр) лагьайла, ам диндиз хас гаф хьиз жезва. Месела, мусурманар хьиз. Гьакъикъат лагьайтIа, масад я: чувуд -им диндин ваъ, миллетдин тIвар я. Мисал яз, лезгияр, аварар, даргияр ва масабур хьиз. Чувуд (еврей) миллетдин арада мусурманар, насараяр (хашпараяр), атеистар, маса динрал амалзавайбурни ава.
Винидихъ чна лагьайвал, иудеярни “чувудар” гафуналди таржума авун дуьз туш, вучиз лагьайтIа “иудеяр” диндиз талукь тIвар я. Къуръандин аятрин баянар лезги чIалаз элкъуьрна гьазурнавай ктабда (таржумачи — Я. Мегьамедов) иудейриз лезгидалди ягьудар лагьанва.
Чи мухбир