27-августдиз, Ахцегь райбиблиотекадин залда Марьям Къазибеговадин “Зи чубарук” ктаб раиж авуниз талукьарнавай мярекат хьана. Махачкъалада ООО “Мавел” чапханада 100 экземпляр аваз акъуднавай 78 чиникай ибарат шииррин кIватIал милли поэзиядал рикI алайбуру хушдиз кьабулна.
КIелдайбурун залда автор вич, ктабдин редактор хьайи и цIарарин автор, лезги писателрин Создин председатель, публицист Максим Алимов, Марьям Къазибеговадин мукьва-кьилиярни ярар-дустар, райондин культурадин идарайрин къуллугъчияр кIватI хьанвай.
М.Къазибегова 1940-йисуз Ахцегьа, РФ-дин лайихлу духтур, дявединни зегьметдин ветеран Абдулвагьидан хизанда дидедиз хьана. Гуьгъуьнлай диде-буба айрутмиш хьуникди тахай дидедин гъилик акатай рушаз хушбахт аялвал акунач, 9-классда аваз гужуналди гъуьлуьз гана. Гена гъуьлуьн кIвале адаз экв акуна, гьатта яру дипломдалди медучилище акьалтIардай мумкинвал хьана. Уьмуьрдин юлдаш Къазибегахъ галаз кIвал, багъ-майишат кутуна, аялар кIвачел акьулдна. 2013-йисуз санал 57 йис уьмуьр куьчуьрмишай итим къакъатайдалай кьулухъ ада вич мад етим хьиз гьиссна, кьилди яшамиш жезва. Сугъул хьайила, вичин уьмуьр, кьилел атай крар рикIел хкиз, чIалар теснифзава.
ЦIи, 80 йисан юбилейдин йисуз, адан чIаларин кутугай ктаб акъатун тебрикуниз лайихлу я. Ктабда гьатнавай эсерар тербиядин манадинбур, рикIиз таъсирдайбур я. Гьавиляй абур иллаки чIехи несилди хушдиз кьабулзава.
РикIин гафар на дикъетдив кIел ая,
Къалмир кIвале, хъел атайла, хъвер ая,
Меслятдалди герек чIавуз мел ая,
ИкI хизанда гьуьрмет квевай хуьз жеда, ингье, гьихьтин веревирдер “Зи чубарук” ктабда гьатнаватIа…
Дашдемир Шерифалиев
