Чун гзаф дуьшуьшра агьалийрикай ийизвай тапаррал расалмиш жезва. Тапархъанар-лутуяр йикъалай-къуз гзаф жезвайди чаз мукьвал-мукьвал СМИ-райни малумарзава, инсанривай чпихъ авай мал-девлетдал (эгер аватIа) мукъаят хьун тIалабзава.
Гьукуматдин дережадикай рахайтIа, телевизордайни тапарарзавай, я тахьайтIа, дериндай фикир тагана, гъавурда гьат тавуна, гъалатIриз рехъ гана, делилар, хабарар агакьарзавай дуьшуьшарни тIимил туш. Аквар гьаларай, и кардин себеб идарайра кIвалахзавай пешекарар усалбур, гъавурда авачирбур хьунихъ галаз алакъалу я.
Мисал яз, 17-апрелдиз заз акур реклама: «Льготное автокредитование» (шикилда). Анай аквазва: машиндин къимет 2 млн манат я, адакай 400 000 манат, куьмек яз, гьукуматди гузва, къачузвай касди хгана кIанзавайди анжах са миллионни 600 агъзур манат я лагьанва, амни — 7 йисан къене, кьезилдаказ, гьар вацра 32 697 манат.
Веревирдер авурла, килиг вуч арадал къвезватIа: 7 йисуз гьар вацра 32 697 манат гайила, санлай 2 746 548 манат жезва. Идал гьукуматди гайи 400 000 манатни гьисаба кьун хъувурла, машиндин къимет 2 млн манат ваъ, 3 146 548 манат жезва.
Ихьтин шаклу, гьакъикъатдиз жаваб тагузвай рекламаяр гьар юкъуз вишералди гузва. Гьа жергедай яз, накь чи хуьруьн юкьвал алкIурай, дяведиз физ кIанзавайбуруз икьрар кутIунунин гьакъиндай теклифзавай рекламадин плакатдикай рахан (шикил за ракъурзава). Ам кIелзавай гзафбур тажуб жезва, агъазвач, гьа жергедай яз — зунни. Вучиз лагьайтIа, са сеферда гузвай пулунин кьадар са миллиардни виш миллион манат яз къалурнава, — акьван пул гуда лагьана садни агъазвач.
Са бязибур гъавурда акьун патал: 1 100 000 агъзур манат им 1 100 000 000 лагьай чIал я. ЧIалахъ хьун патал кIаник квай «204 тыс.руб» — ди субутарзава, ам 205 000 яз гьисаба кьазва кьван. Инсанрин кьил элкъвезва, ийир-тийир хьана амукьзава: и плакатар чи республикадин вири хуьрера, шегьерра инсанриз аквадай чкайрал алкIурнава эхир. Язух тушни?
Чир хьанайтIа, кIандай и плакатдин патахъай: республикадин военкоматдин ва хкязавай пунктунин сагьибри гьикI кIелзаватIа пулдин кьадар.
Белки, дугъриданни, гьа алай кьадар, яни са сеферда са миллиардни виш миллион гузватIа? Гуз хьанайтIа, лап зунни фидай. Акьванди гузвайди туштIа, ам кхьин вучиз авунва лугьудай садни авач. Эгер ягъалмиш хьана гьакьванди кхьенватIа, гуьгъуьнлай хьайитIани, туькIуьр хъувуна, гъавурда хтуна кIандачни?!
Т. Темирханов,
Мегьарамдхуьруьн райондин Гъепцегьрин хуьр
