Гьар йисан 16-ноябрдиз Россиядин ФСИН-дин (Федеральная служба исполнения наказаний) УИС-дин (уголовно-исполнительная система) ветеранрин югъ къейдзава. 40 лагьай сеферда кьиле тухузвай лишанлу йикъаз талукьарнавай шад мярекат Махачкъалада Дагъустан Республикада авай Управленидани кьиле фена. Аниз ветеранриз — республикадин и къурулушда жуьреба-жуьре йисара зегьмет чIугур ва уголовный жазадиз талукь идараяр арадал гъуник пай кутур ксариз — эвернавай. И югъ абуруз Управленидин кьиле авай ксари, отделрин ва къуллугърин начальникри, къурулушда зегьмет чIугвазвайбуру тебрикна.
Дагъустандин УФСИН-дин начальникдин везифаяр вахтуналди тамамарзавай къенепатан къуллугъдин полковник Расим Мегьтиева ветеранриз яргъал йисарин гьакъисагъ зегьметдай сагърай лагьана. Къенин юкъузни абуру республикадин уголовно-исполнительный къурулушдин кIвалахда дурумлувал таъминаруник лайихлу пай кутазвайди къейдна. ГьикI хьи, лайихлу пенсияда авазни, абурукай гзафбуру чпи зегьмет чIугур идарайрин уьмуьрда активнидаказ иштиракзава, жегьил къуллугъчийрив пешекарвилин девлетлу тежриба агакьарзава. Абур жегьилар патал насигьатчияр я. Ветеранрин йикъан макьсадни къуллугъчийрин несилрин арада алакъа мягькемаруникай, къурулушдин хъсан адетар хуьникай ва абур жегьил пешекаррал агакьаруникай ибарат тирди къейдна.
— Чи ветеранар къуллугъдин ва пешекарвилин буржи намуслудаказ кьилиз акъудунин, журэтлувилин чешнеяр я. Куь регьбервилик кваз пешекар къуллугъчийрин тек са несил туш чIехи хьанвайди. Квекай гзафбур къенин юкъузни «жергеда ава». Куьне къурулушдин хъсан ва машгьур адетар хуьник ва абур жегьил къуллугъчийрал агакьаруник пай кутазва, абур ватанпересвилин руьгьдаллаз тербияламишунин кIвалахда иштиракзава, гьакIни обществода санлай къурулушдикай хъсан фикир арадал гъиз куьмекзава. Ветеранрин тешкилатрик кваз, Дагъустандин УИС-дин къуллугъчияр пешекарвилин, эдеб-ахлакьдин, ватанпересвилин руьгьдаллаз тербияламишуник лайихлу пай кутазвай ксариз заз мадни кьетIендаказ сагърай лугьуз кIанзава, — къейдна Расим Мегьтиева.
Россиядин ФСИН-дин ветеранрин общественный тешкилатдин ДРО-дин председатель Афсаладдин Къахаева лишанлу йикъаз талукьарнавай мярекатдай, чими келимайрай сагърай лагьана.
— Къенин юкъуз, пешекарвилин вузар акьалтIарна, уголовно-исполнительный къурулушдиз кIвалахал къвезвай жегьил пешекаррин гьазурлухвал писди туш. Амма пешедин четинвал, кьетIенвал (дустагънавай ксарихъ галаз тухузвай кIвалахдиз сакIани регьятди я лугьуз жедач) фикирда кьуна, кIвалахдин тежриба жегьил пешекаррив агакьаруналди, ветеранри абуруз уьмуьрдин дуьз терефар хкягъиз куьмекзава. Зун кIевелай инанмиш я хьи, Россиядин ФСИН-дин Дагъустанда авай Управленидин кьиле авай ксари чахъ — ветеранрихъ — галаз санал республикадин уголовно-исполнительный къурулушдин кIвалах хъсанарун патал чпин къуватарни чирвилер серф авуналди, чи уьлкведин и къурулушдин хъсан адетар лайихлудаказ давамарда, — лагьана А. Къахаева.
Малум хьайивал, алай вахтунда Дагъустандин УИС-дин ветеранрин тешкилатда саки 1500-дав агакьна ветеранар ава. Абурун чIехи пай, отставкадиз экъечIайлани, общество патал хийирлу краривай къерех жезвач. Абуру гзафни-гзаф чирвилер гудай идарайра кIвалах тухузва, акьалтзавай несил эдебдинни ахлакьдин, ватанпересвилин руьгьдаллаз тербияламишуник лайихлу пай кутазва.
Акьалтзавай несил ватанпересвилин руьгьдаллаз тербияламишунай ва жегьил пешекаррив тежриба агакьарунин жигьетдай тафаватлу хьайи ксарив эхирдай гьуьрметдин грамотаяр, чухсагъулдин чарар ва къиметлу пишкешар вахкана. Кьилди къачуртIа, шабагьриз лайихлу хьайибурун арада генерал-полковник Г.Н. Трошеван тIварунихъ галай Дагъустандин кадетрин 1-корпусдин тербиячи Къагьриман Исрафилов ва Дагъустандин УФСИН-дин 1-СИЗО-дин ветеранрин отделенидин председатель Фазил Асланов авай. Гьайиф хьи, бязи себебралди абурувай и мярекатда иштиракиз хьанвачир.
Шад мярекатдал рахай ветеранри ва пенсионерри Дагъустандин УФСИН-дин кьиле авай ксариз лишанлу югъ тебрик авунай, гьакI чIугур зегьметдин лайихлувал квадар тавунай сагърай лагьана.
Рагнеда Рамалданова
