18-ноябрдиз Дагъустандин Гьукуматдин Председатель Абдулмуслим Абдулмуслимова республикадин мулкунал проектар уьмуьрдиз кечирмишзавай инвесторриз государстводин патай куьмек гун патал конкурсар кьиле тухуниз талукь Республикадин комиссиядин заседание кьиле тухвана.
Заседанидин сергьятра аваз, комиссиядин членри «Алияк» ООО-ди кьилиз акъудзавай инвестпроект виридалайни важиблубурун дережадиз акъудун метлеблу кар яз гьисабдай къарар кьабулна. Ихьтин дережадиз акъудуни проектдиз налогрин рекьяй кьезилвилерикай менфят къачудай мумкинвал гузва.
СтIал Сулейманан райондин Кьасумхуьре мугьманханадин комплекс ва къурулушдиз талукь объектар, гьа гьисабдай яз 30 нумрадикай (кIваликай) ибарат мугьманхана, ресторан, фитнес-зона ва конференц-зал, хсуси карханади акъудзавай суьрсет маса гудай алишверишдин объект эцигда ва машинар акъвазардай чка туькIуьрда.
Проект 2024-2029-йисара кьилиз акъуддайвал я, адан къимет — 330 миллион манат. Пландин бинедаллаз ина 25 касдиз кIвалахдай чкаяр хьун ва региондин саналди тир бюджетдиз инвестпроектди 105 миллион манат налогар гъун лазим я.
А.Абдулмуслимова къейд авурвал, им «Алияк» ООО-ди регионда кьилиз акъудзавай инвестицийрин сад лагьай проект туш. ИкI, Дагъустандин кьиблепата инвесторди туриствилинни сагъламвал мягькемарунин «Кпул-Ятар» комплекс ва, бинедилай башламишна, эхирдалди (суьрсет муьштерийрив агакьдалди) вири крар вичи ийизвай некIедин метягьрин ферма эцигунин проектар кьилиз акъудзава.
РД-дин карчивилин ва инвестицийрин рекьяй Агентстводин регьбер Гьуьсейн Гьуьсейнован гафаралди, проектдин бинеда республикадин дагъдиз мукьва мулкуна Дагъустан патал гележег авай туризмдин хиле нетижалу бизнес арадал гъун ава. Ам Кьасумхуьруьн чилел 0,63 гектарда кьилиз акъуддайвал я.
«Икьрар кутIуннава ва электричестводалди, газдалди таъминарунин рекьяй разивал къачунва, инженервилин кIвалахриз талукь вири ахтармишунар кьиле тухванва. Мугьманханадин проект гьазурнава ва эцигунрин кIвалахар гъиле кьадай ихтияр ганва. Инвестпроект экономика патал менфятлуди я, ада кIвалахдин цIийи чкаяр арадал гъиз куьмекда», — лагьана Гь. Гьуьсейнова.
Жасмина Саидова
