22-февралдиз пакаман сятдин 10-даз Ахцегьа, Ленинан куьчеда кардик квай «многофункциональная» юкьван школада, Дагъустандин Халкьдин Собранидин депутат Владимир Ашурбегован экуь къаматдиз бахшна, волейболдай итимрин командайрин арада турнир кьиле фида. Идакай чаз райадминистрациядин пресс-къуллугъди хабар гана. Волейболдал рикI алай виридаз турнирдиз атун теклифзава.
Виликамаз авай малуматдалди, турнирда Ахцегь ва СтIал Сулейманан районрин, гьакIни Каспийск ва Махачкъала шегьеррин хкянавай командайри иштиракда. Спортдин майдандал гьам чIехибурукай, гьамни жегьилрикай ибарат тир командайри чпин устадвал къалурда.
Турнирдин макьсад, машгьур ватанэгьлидин экуь къамат рикIел хкунихъ галаз сад хьиз, акьалтзавай несил ватанпересвилин руьгьдаллаз тербияламишун, иллаки аяларни жаванар спортдал желб авун, сагълам уьмуьр кьиле тухуниз эвер гун, гьакIни районда волейбол вилик тухун я.
Тешкилатчийри инанмишвилелди къейдзавайвал, турнир рикIел аламукьдайди, руьгь тухардайди жеда.
Рагнеда Рамалданова
