6-октябрдиз «Дагъустан» РИА-дин майдандал Дагъустан Республикадин военный комиссар, полковник Абдурагьман Мурадханова брифинг кьиле тухвана. Ада республикадин СМИ-рин векилриз уьлкведа зулун призывдив эгечIнавайдакай суьгьбетна.
Военкомди сифте нубатда республикада гатфарин призыв кьиле фейивилин нетижайрикай малумат гана.
«РикIел хкун лазим я хьи, цIи чна Гитлеран фашистрал гъалиб хьайидалай инихъ 80 йис тамам хьун къейдна. 2025-йис уьлкведин Президентди Ватан хуьзвайбурун йисни яз малумарна. Гьавиляй Россиядин армиядиз жегьилар желб авунин месэлани важиблуди тир. Чна республикадин вилик эцигнавай везифаяр вахтунда тамамарна. Яракьлу Къуватрин частариз, соединенийриз кьуд агъзурдалай виниз жегьилар рекье туна. Абур чкайрал самолетри, поездри агакьарна», — лагьана А. Мурадханова.
Ада гатфарин призыв хъсандиз тешкилай шегьеррин ва районрин тIварар кьуна. Ингье абур: Махачкъала, Дербент, Дагъустандин Огни, Каспийск, Буйнакск ва Хасавюрт шегьерар, Новолак, Дербент, СтIал Сулейманан, Кьурагь, Дахадаев, Къизилюрт, Мегьарамдхуьруьн, Табасаран, Буйнакскдин, Гуниб, Хунзах районар.
Военкомди малумарайвал, зулун призывни чешнелувилелди кьиле тухун патал вири гьазурвилер акунва. Герек парталар, недай суьрсет ва маса шейэр вири чкайрал ала. Районрин военкоматри агьалийрихъ галаз тешкиллувилин, гъавурда тунин кIвалах тухузва. Талукь яшдин агьалийрив повесткаяр агакьарзава.
Повестка вугайдалай кьулухъ къад йикъан вахтунда жегьил военкоматдиз татай дуьшуьшда, ам жавабдарвилиз чIугун мумкин я. Гьавиляй, кьил къакъуд тавуна, армиядиз къуллугъ ийиз, итимвилин буржи кьилиз акъудиз фин буржарикай я. Повестка гатфариз вугайди армиядиз тухун тавуртIа, зулуз хутахда.
А. Мурадханова къейд авурвал, Россиядин армияда илимдин, спортдин кьилдин ротаярни кардик ква. Гьа частара къуллугъдай лайихлувилер авай ксари, районрин военкоматра амаз, чпин кеспийрикай, алакьунрикай, вердишвилерикай комиссияр хабардар авун герек я.
— 15-октябрдиз жегьилрин сад лагьай десте армиядиз рекье твада, — лагьана А. Мурадханова. — Призывникри Россиядин Яракьлу Къуватрин вири жуьрейрин частара къуллугъда. Дяведин махсус серенжемдиз абур желбдач. Са йисуз къуллугъ авурдалай гуьгъуьниз вири чпин кIвалериз ахъай хъийида.
Чи мухбир
