Дагъустан международный дережада аваз тешкилзавай Каспийскдин рекъемрин форум кьиле тухудай майдан яз пуд лагьай сеферда хкянава. ЦIи ам 30-31-октябрдиз кьиле фида.
Вилик йисара хьиз, цIини алай аямдин технологийрин мумкинвилериз, кьетIенвилериз талукьарнавай и мярекат РФ-дин къецепатан крарин ва рекъемрин рекьяй вилик финин министерствойрин куьмекдалди тешкилзава. Форумда РД-дин Кьил Сергей Меликовани иштиракда.
ЦIи, форумдин сергьятра аваз, жуьреба-жуьре месэлаяр веревирдда. Абурукай кар алайбурун жергеда Каспийскдин региондин месэлаяр гьялунин карда рекъемрин технологийрикай менфят къачун, Каспий гьуьлуьхъ галаз алакъа авай уьлквейра маркетплейсар вилик тухун, уьлквейрин арада яшайишдин жуьреба-жуьре хилерай рекъемрин каналрай амадагвилин алакъаяр мягькемарун ава.
Къейд ийин хьи, форумдин программада Каспий гьуьлуьхъ галаз алакъада авай уьлквейрин жегьилар патал тешкилзавай мярекатризни кьетIен фикир гудайвал я.
Чи мухбир
