Къе, 20-мартдиз, Сулейман-Стальский райондин аялрин яратмишунрин кIвале Виридуьньядин шииратдин йикъаз талукьарнавай мярекат кьиле фена. Идакай «Лезги газетдиз» райадминистрациядин пресс-къуллугъди хабар гана.

Ана шаирри, писателри, Сулейман-Стальский ва къунши районрин интеллигенциядин векилри, жегьил литераторри иштиракна.

Эдебиятдин мярекат «Куьредин хабарар» газетдин кьилин редактордин заместитель, «Куьредин ярар» медениятдин макандин векил, шаир ва журналист Абидин Камилова ачухна. Ада вири иштиракчийриз кьетIен югъ мубаракна, ихьтин суварихъ яратмишзавайбурун арада дуствал мягькем хьунин, сад-садав агатунин, шииратдин тешкилатрин алакъаяр сих хьунин карда хъсан метлеб авайди къейдна.

Мярекатдал шииратдин темадиз талукь докладарни кIелна. Шаирар тир Сажидин Саидгьасанова, Сейфудин Шагьпазова, Абидин Камилова, Назифа Юркъулиевади, Жульета Омаровади ва масабуру чпин шиирар кIелна.

«Лезги газет»