11-17-мартдиз Дербентда 2005-2006-йисара дидедиз хьайи жаван спортсменрин арада РД-дин кIвенкIвечивал патал боксдай акъажунар кьиле фена.

Сулейман-Стальский райондин администрациядин пресс-къуллугъди «Лезги газетдиз» хабар гузвайвал, акъажунра Дагъустандин районрайни шегьеррай 243 спортсменди, гьа жергедай яз Сулейман-Стальский райондин КIварчагърин ва Агъа СтIалрин боксеррикай ибарат командадини иштиракна.

Къуватлу спортсменар хкягъунин макьсаддалди тухвай акъажунрин нетижада тренер Альберт Межидован регьбервилик кваз боксдал машгъул Абумуслим Гереева (37 кг), Мирзамегьамед Абдулвагьабова (38,5 кг) ва тренер Роберт Нагъиеван регьбервилик кваз боксдал машгъул Амин Таибова (46 кг) пуд лагьай чкаяр кьуна.

Агалкьунар хьайи боксерриз медалар, грамотаяр ва кубокар гана. Лап хъсан спортсменриз махсус пишкешарни гана. Акьалтзавай несил спортдал желбзавай тренер Альберт Межидовни махсус пишкешдиз лайихлу хьана.

«Лезги газет»