19-мартдиз, лезгийрин милли Яран сувар къейдунин сергьятра аваз, Сулейман-Стальский районда «Жуван адетар хуьн» тIвар алай конкурс кьиле фена. Идакай «Лезги газетдиз» райондин администрациядин пресс-къуллугъди хабар гузва.
Конкурсда райондин мектебра кIелзавайбурукай ва аялрин яратмишунрин кIвале чирвилер къачузвайбурукай ибарат 15 командади иштиракна.
Мярекатда райондин кьил Нариман Абдулмуталибов, райондин идарайринни тешкилатрин жавабдар къуллугъчияр, яратмишзавайбурун интеллигенциядин векилар, образованидин идарайрин муаллимрин коллективар авай.
Хванахвавилин адетар вилик тухунин макьсаддалди мярекатдиз Хив райондин кьилин меслятчи Къачмаз Меликова кьиле авай Хивдин мектебда кIелзавайбурун дестедизни теклифнавай.
Конкурсдин кьилин мурад халкьдин адетар винел ахкьалдарун, жегьил несилрин фикир лезги милли тIуьнрал желбун, халкьдин лап хъсан хуьрекар къалурун тир.
Конкурсда иштиракай гьар са мектебдин дестеди милли адетрихъ галаз алакъалу недай жуьреба-жуьре хуьрекар, няметар алай суфраяр къурмишнавай. Мярекатдин вахтунда гьар са командади чпин хуьрекрин презентация тухвана, гьазурнавай хуьрекдин тарихдикай ва ам гьазурунин къайдайрикай ихтилатна.
Вири мугьманриз куьгьне адетрин къайдайралди гьазурнавай тIямлу хуьрекар дадмишдай мумкинвал хьана. Абуруз иллаки «ЦикIен», «Кака алай фу», «Камбар», «ГитI», «МехкIуьт», «НутIуфа», «Кифетлу чай» бегенмиш хьанвай.
Мярекатдин эхирдай жюридин дестеди гъалибчиярни тайинарна. ИкI, виридалайни хъсан суфра тешкилай Шихидхуьруьн мектебдиз сад лагьай чка гана. Кьвед лагьай чкадал ЦIийи-Макьарин мектеб ва пуд лагьай чкадал Кьулан СтIалрин Р.Халикьован тIварцIихъ галай мектеб хьана.
Нариман Абдулмуталибова кьиле фейи мярекатдихъ лезги халкьдин медениятдинни тарихдин ирс хуьнин карда еке метлеб авайди къейдна. Гъалиб хьайи ва хъсан чкаяр кьур командайриз райондин администрациядин патай къиметлу савкьатар, Имам Яралиеван мергьятматлувилин «Умуд» фондунин патай пулдин пишкешар ва образованидин управленидин патай грамотаяр гана. Хив райондай мугьман хьайи дестедизни къиметлу савкьат гана.
«Лезги газет»
