Саласа юкъуз Махачкъалада, ина кардик квай лезгийрин милли культурадин автономиядин (МЛНКА) кIвале, женгчи шаир, ашукь, кесиб халкьдин панагь хьайи Кьуьчхуьр Саидан 250-йисан юбилейдиз гьазурвилер акуниз талукьарнавай мярекат кьиле фена. Ана автономиядин председатель Пакизат Рагьимхановади, Дагъустандин ННТ телеканалдин шеф-редактор Гуьллер Камиловади, «Лезги газетдин» политикадин отделдин редактор Нариман Ибрагьимова, Махачкъаладин УЖКХ-дин отделдин начальник Хидир Агъамова, Махачкъаладин 1-нумрадин СИЗО-дин начальникдин заместитель Фазил Асланова, композитор, шаир, таржумачи Мурад Саидова ва масабуру иштиракна.
Рахай саки вири ксари къейдна, Куьредин ханариз акси экъечIна, зегьметчи халкьдин итижар хвейи, абурун зулумдикай хкечIун патал женгериз эвер гайи, сифтебурукай яз лезги чIалал жавагьирар теснифай, вичелай гуьгъуьниз майдандиз атай лезги шаирриз дидед чIалални шиирар устадвилелди теснифиз жедайди чирай, абуруз дуьз рехъ къалурай Кьуьчхуьр Саид ва ада лезги, Дагъустандин литература еримлу авуник кутур пай рикIелай алудзава. Адан яратмишунар гилалдини тамамвилелди ахтармишнавач. Шаирдин эсеррин тамам са ктабни чапнавач. Саидан юбилеяр вахт-вахтунда тухванач. Ингье гилани шаирдин 250 йисан юбилей вилик ква. Гьайиф хьи, я РД-дин Гьукуматди, я культурадин министерстводи Кьуьчхуьр Саидан юбилей тухуниз талукь яз са серенжемни планрик кутунвач.
Ихьтин гьал фикирда къуна, рахай ксари теклифар гана:
- «Кьурагь район» МР-дин, Кьуьчхуьррин хуьруьн администрациядин кьилер, Дагъустандин писателрин Союз кьиле аваз оргкомитет тешкилин;
- Кьуьчхуьр Саидан эсеррикай ва таржумайрикай ибарат ктаб чапдай акъудин;
- Я Кьурагь районда, я Бугъдатепеда (кьуьчхуьрвияр куьч хьанвай хуьр) сентябрдин вацра (23, я 30-йикъар) шаирдин юбилей къейд ийин;
- Кьиблепатан Дагъустандин районрин культурадин идарайра, школайра ашукьдин уьмуьрдиз, яратмишунриз талукьаранвай мярекатар тешкилин.
Хийир Эмиров
