30-майдиз Ахцегь райондин дминистрациядин залда райондин активдин нубатдин совещание хьана. Сифте гаф рахуналди ва йикъан месэлаяр малумаруналди, ам «Ахцегь район» муниципалитетдин кьил Осман Абдулкеримова ачухна ва кьиле тухвана.
Йикъан кьилин месэладай Ахцегь муниципалитетдин экономикадин отделдин начальник Радик Эфендиева налогар кIватIунин ва чилерни капитальный эцигунар (ОКС) актуализироватунин гьакъиндай хуьрерин администрацийри (СП) алай йисан 5 вацран планар ацIуруниз талукь гьахъ-гьисаб авуна. Ада къейд авурвал, алай вахтунда районди пландин тапшуругъар эменнидал къвезвай налогдай 92% ва чилин налогдай 84 %, санлай 88 процентдин тамамарнава. Кьилди къачуртIа, Хуьруьгрин, Смугъулрин, Гутумрин, Чеперин, Ухулрин ва Ялахърин хуьрерин СП-ра налогар кIватIунин 5 вацран тапшуругъар 100 процентдин тамамарна. Виридалайни чIехиди тир «сельсовет Ахтынский» СП-да и рекъемри эменнидиз талукь яз — 104 %, чилин налогдиз талукь яз – 101 %, санлай 86 % тешкилзава. Капитальный эцигунар ва чилер актуализироватунин гьакъиндай 5 вацран планар, талукь тирвал, 46 ва 56 процентдин тамамарнава. Инал райондин регьбер Осман Абдулкеримова алава хъувурвал, гьафтедин муддатда райондин вири СП-ри чпин планрин тапшуругъар 100 процентдин тамамарун лазим я.
Ахпа Радик Эфендиев СП-рин куьчейризни кIвалериз тIварар ва нумраяр — адресар ягъунин ва 2018-йисан 1-январдалди районда мажибдал алай вири къуллугъчияр пулар гунин «Мир» къурулушдал элячIунин месэлайрикай рахана.
Совещанидин кьвед лагьай пай кьетIен шадвилинди хьана. Осман Магьмудовича РД-дин культурадин министр Зарема Бутаева хушвилелди кьабулна.
— Ахцегь райондин баркаван чилел Дагъустандин культурадин министр, вучиз ятIани, атун тавуна 20 йисалайни пара вахт тир. Къе чун и мугьманвилел гзаф шад я, — и гафаралди ада вири районэгьлийрин патахъай Зарема Ажуевна рикIин сидкьидай тебрикна ва райондин культурадин хилен бязи агалкьунрикай рахана. — Эхиримжи 2 йисан къене чна бюджетдинбур тушир такьатрихъ Х.Тагьиран ва В.Эмирован тIварарихъ галай ял ядай паркар туькIуьр хъувуна. РД-дин лайихлу муаллим М. Абдулкеримован тIварунихъ галай «Просвещение» фондунин такьатрин гьисабдай райондин библиотека ремонтна, карчи А.Палчаеван такьатрихъ Джорджан Дебернардидин муьгъ гуьнгуьниз хкана. Хуьруьгрин хуьруьн Культурадин кIвал туькIуьр хъувуна. Къведай йисуз Ахцегьрин Культурадин кIвал цIийикIа туькIуьр хъувун фикирдиз къачунва… И месэлайрай, гьелбетда, чна республикадин руководстводин, кьилди къачуртIа, РД-дин культурадин министерстводин куьмекни гьиссзава.
— Ахцегь райондиз зун сифте яз атанвай, дагълух гуьзел тIебиатни, инсанарни рикIиз гьакьван хуш я, — къейдна Зарема Бутаевади. — Республикадиз, уьлкведиз тIвар-ван авай цIудралди баркаллу рушарни рухваяр ганвай Ахцегьар кьетIен чка я. Къе зун Россиядин халкьарин адетринни культурадин Центрдихъ, райондин ял ягъунин Центрадихъ (МКУК МКДЦ), РД-дин милли музейдин Ахцегьрин чешнелу филиалдихъ, Алла Жалиловадин тIварунихъ галай искусствойрин школадихъ, Рагьимат Гьажиевадин тIварунихъ галай музшколадихъ ва тамашуниз лайихлу бязи маса чкайрихъ галаз таниш жеда. Анра материалринни тадаракрин чарасуз база мягькемарун патал алакьдай куьмекарда…, — келимайрилай кьулухъ ада райондин МКДЦ-дин тежрибалу хореограф Гьажи Агъаеваз «РД-дин культурадин лайихлу работник» лагьай тIвар ганвайди раижна ва адаз и дережа РД-дин Кьил Рамазан Абдулатипован тIварунихъай мубаракна. Ахпа министрди райондин ял ягъунин Центрадин директордин заместитель Абдулкерим Рагьимовав, Хуьруьгруьн хуьруьн КДЦ-дин директор Назир Чубановав ва Р.Гьажиева тIварунихъ галай музшколадин муаллим Селимат Велиевадив РД-дин культурадин Министерстводин гьуьрметдин грамотаяр вахкана.
Совещаниедилай кьулухъ РД-дин культурадин министр Зарема Бутаевади инсанрин кьилдин ва абуру итиж ийизвай месэлайрай районэгьлияр кьабулна.
Дашдемир Шерифалиев
