Музыкадин тербия гунин рекьяй, урусрин тарихда манияр ядай килисайрин сад лагьай школайрилай гатIунна, Петербургдин­ ва Москвадин хордин училищей­рилай хкатна, гзаф инсанри санал манияр лугьудай (хор) коллек­тивриз кьетIен фикир гана.И кIва­лах гилани давам жезва. Им чи уьл­кведин музыкадин культурадин­ ви­­жевай диб я.

Иллаки кIелиз экечIнавай сад лагьай йисалай хордин классда сифте лугьунин вердишвилер, ахпа регьбервилин ва муаллимвилин бажарагълувал арадиз гъида.­ Ихьтин хор Дербентдин музыкадин училищедани кардик кваз 50 йис я.

Училищеда хордин дирижированидин отделение ачухайдалай инихъ адаз чи ватанэгьли, ери-би­не СтIал Сулейманан райондин­ Курхуьрелай тир Ибрагьим Иб­ра­гьимова регьбервал гузва.

И.Ибрагьимов кьатIунар авай аял хьуниз килигна, бубади ам, вад йисни зур тамам хьайила, школада туна. Шегьердин 3-нумрадин школада 7-класс кутягьайла, ам Махачкъаладин музыкадин училищедин халкьдин алатрин отделенидик экечIна. Са йисуз ина кIелайдалай гуьгъуьниз ам  Дербентда ачухай культпросветучилищедиз хквезва. Анин эхиримжи курсуна кIелзамаз, адаз Дербентдин хуьруьн майишатдин техникумда художественный самодея­тельностдин руководителвилени­ кIва­лахун теклифзава. Са куьруь вахтунда ина Ибрагьим муаллимди баражагъ авай студентрикай хордин коллектив тешкилна, абур хордин искусстводиз шерик авуна. Коллективди шегьерда ва техникумда кьиле тухузвай суварриз чпин алакьунар къалурна. Студентарни, техникумдин кьиле авай ксарни Ибрагьим муаллимди тухвай кIвалахдилай рази яз амукьна.

Культпросветучилище акьал­тIа­рай 1965-йисуз ам Махачкъалада госпединститутдин музфакультетдиз гьахьна.

Анаг куьтягьай 1969-йисуз Иб­рагьимов кIвалахиз Дербентдин педагогвилин училищедиз ракъур­на. Са йисалай адаз къуллугъиз (1970-1971-й.) Советрин Армиядин жергейриз эверзава. Армиядай хтайла, кIвалахиз училищедиз хъфена.

1972-1977-йисара, кIвалах­д­и­вай къерех тахьана, Уфа шегьерда авай искусствойрин госинститутда кIелна. 1973-йисалай гилалди ада Дербентдин музыкадин училищеда хордин дисциплинайрай муаллимвиле, 1978-йисалай хордин дирижированидин отделенидин заведующийвиле гьакъисагъдаказ зегьмет чIугвазва.

И йисара ада училищедани кIвалахиз, Дербентдин культурадинни искусствойрин институтда, шегьердин 2-нумрадин музыкадин школадани зегьмет чIугуна.

-Училищедин хордин агалкьун­рикай неинки са Дербентда, гьакI Дагъустандилай къецени ван чкIан­ва. Ам шегьерда кьиле физвай вири мярекатрин активлу иштиракчи я. Ибрагьим муаллимдин регьбервилик кваз хорди гьар жуьре конкурсра, фестивалра иштиракна, анра пешекарвилин рекьяй чкадиз атанвай коллектив яз къалурна. ИкI, 2022-йисуз Дондал алай Ростов шегьерда «Дуьз несил» лишандик кваз кьиле фейи  гзаф жанрайрин яратмишунрин международный конкурсда училищедин хордин коллектив лауреатвилин тIварцIиз, 1-дережадин дип­ломдиз лайихлу хьана.

Гьа и йисуз Москвада 2-сеферда кьиле фейи «Зи халкьдин­ музыка милли эменни хьиз я» международный ачух онлайн-кон­курсда, «Милли чIалал мани­ лугьун» номинациядай 2-дережа­дин­ диплом­диз лайихлу хьана­. Москвада Вирироссиядин­ хордин жемиятди 2021-йисуз тухвай фестивалда училищедин хор 1-дережадин лауреатвилин, 2022-йисуз  гьа и фестивалда  Рос­сиядин Кеферпатан Кавказдин­ федеральный округдай «Яш тамам хьанвай пешекарвилин ва кIелзавайбурун хоррай» дипломантвилин тIвара­рин сагьиб хьана». Хоровое дирижирование» отделенидин 4-курсуна кIелзавай сту­дентка Алима Имамалиевади­ Нальчикда кьиле­ фейи Кеферпа­тан Кавказдин ди­рижеррин-хоро­викрин 5-конкурс­да­ 2-чка кьуна. Судентрин ва муаллимдин агалкьунар Дагъустан Республикадин культурадин министерстводи рази­вилин чар гуналди къейдна.

Ибрагьим муаллимди 2009- 2015-йисара Дербентда кардик квай ветеранрин «Лейся, песня» хордизни регьбервал гана. Ветеранрин хор шегьерда кьиле физвай ватанпересвилин мярекатра гуьзлемишзавай коллектив тир. Абурун репертуарда, ватанпересвилин хьиз, Ватандин ЧIехи дяведин темадай кхьенвай маниярни авай.

Ибрагьим Абдуллаевича РД-дин халкьдин артист Суьлгьия Гьажиевадин ктабда гьатнавай 46 манидиз нотаяр кхьена. Ам Дербентдин культурадинни искусстводин институтдин гьар йисуз кьиле физвай «Устадвал ва гьевеслувал» конкурсдин жюридин членни я. ГьакIни «хордин дирижирование» отделенидин са шумуд выпускдин куратор-руководитель хьана.

Ибрагьим Абдуллаевича тербия ва чирвилер гайи выпускник­ри (Наиля Шихмурадовади, Виктория Ибрагьимовади, Наталия­ Матвейченкоди, Къагьриман Ибрагьимова ва хейлин масабуру) кьилин учебный заведенийра кIелун давамарна, пешекарвилин рекьяй кол­леджра, консерваторийра, район­рин алава образованидин ва умуми образованидин школайра, гьакIни культурадин идарайра зегьмет чIугвазва.

Яргъал йисара чIу­гур гьакъисагъ зегьметдай, акьалтзавай несилдиз культурадинни эстетикадин тербия гуник пай кутунай Ибрагьим Абдуллаевич Дагъустан Рес­публикадин культура­дин лайихлу работник лагьай тIварцIиз, РД-дин культурадин министерстводин Гьуьр­метдин грамотадиз, Дербент райондин ва шегьердин администрацийрин патай разивилин чарариз лайихлу хьана.

И йикъара Ибрагьим муаллимди вичин 75 йисан юбилей къейдна. Адаз талукь шад мярекатдал Дербентдин музучилищедин директор Камилла Магьмудовади, юбилей тебрик авуналди, лагьана: «Ибрагьим Абдуллаевич муаллимрикай виридалайни хъсанди я. 50 йисан къене куьн везифайрив намуслудаказ эгечIна, куьне са шумуд несилдиз музыкадин рекьяй дерин чирвилер ва тербия гана. Заз куьн гьамиша регьимлу, къайгъудар муаллим-насигьатчи яз амукьна кIанзава».

Ибрагьим Абдуллаевич гьуьр­метлу хизандин кьил я. Адан ­уьмуьрдин юлдаш Лариса Сейфул­лаевнади, вилерин духтур­ яз, Дербентда поликлиникада кIва­лах­за­ва. Абурухъ пуд велед, абурухъни­ виридахъ кьилин образование ава. Загьир карчи я. Мурада Дербентдин медколледжда, Наидади музыкадин муаллим яз школада кIва­лахзава. Ибрагьим Абдуллаевич ва Лариса Сейфуллаевна пуд хтулдин бахтлу чIехи бубани баде я.

Ибрагьим Абдуллаевичаз 75­ йисан юбилей рикIин сидкьи­дай му­барак авуналди, чаз адахъ мягькем сагъламвал, гьам кIвалахда, гьам­ни уьмуьрда мадни еке агалкьунар хьана кIанзава.

Къагьриман  Ибрагьимов