Гьисабзавайвал, уьмуьр вич вичиз авахьна физва. Амма гьакъикъатда акI туш. Уьмуьрдин рекьин терефар инсанри хкязава, гьабур я и гьерекат виликди тухузвайбур.
Гьелбетда, инал ихтилат активлу ин-санрикай, новаторрикай, чпин уьмуьрдин ва гражданвилин фикиррал кIевибурукай физва. Гьа ихьтин инсанрин жергедик Дагъустанда машгьур экономист, “Главдагестанводстройдин” начальникдин заместитель Ибрагьимов Рашид Ибрагьимовични акатзава.
Гьар вахтунихъ вичиз хас лишанар жеда. Дагъустан патал цуьк акъудай вахт халкьдин майишатдин вири хилер, иллаки хуьруьн майишат йигин еришралди виликди тухуз башламишай йисар тир. А чIавуз чи республикадал Россиядин дигидай ятарин 40 процент гьалтзавай. Гьаниз килигна, абур цIийикIа туькIуьр хъувун ва инженервилин дигидай къурулушар арадал гъун патал “Главдагестанводстрой” тешкилнай. Ам тамамдаказ СССР-дин мелиорациядин ва ятарин майишатдин Министерстводин идарадик квай. Республикадиз и макьсаддалди гзаф кьадар капитальный такьатар чара авунай. КПСС-дин Дагъустандин обкомдин 1972-йисуз хьайи “Республикада цик квай чилер ишлемишунин ва ятарин майишатда авай виле акьадай нукьсанар арадай акъудунин серенжемрин гьакъиндай” пленумдал къейд авурвал, и макьсад патал чара авунвай капитальный такьатрин анжах 55,9 % ишлемишиз алакьна. “Главдагестанводстройдин” вири руководстводиз лагьайтIа, и нетижаяр себеб яз, туьнбуьгьар авунай. КПСС-дин обкомди “Главдагестанводстройдин” вири руководство республикадиз чара авунвай капитальный такьатар тамамдаказ ишлемишун патал тади гьалда лазим тир вири сережемар кьабулуниз мажбурнай.
Р.И. Ибрагьимов са гьафтедин вахтунда Главкдин вири подразделенийриз (абур 50-далай гзаф авай) фена, гьар са карханадин кIвалахдай кьил акъудна, абуру пуд сменада нетижалудаказ кIвалахун патал лазим вири серенжемар кьабулна. И карханайри са суткада ийизвай кIвалахдин кьадар гуьзчивилик кутуна. Виридалайни хци месэла — механизаторар ва эцигунардай хилен маса кадрияр бес тахьун Р.Ибрагьимова вичин кьетIен гуьзчивилик кутуна.
За эцигунардай вири пешейрай гьар йисуз 1000-далай гзаф рабочияр гьазурзавай Главкдин чирвилер гудай комбинатдин директор яз кIвалахзавай. Кьилин комбинат — Хасавюртда, Махачкъалада ва Черняевкада адан филиалар авай. Атана чи патав Рашид Ибрагьимович, кIватIна вири коллектив, сад лагьай зур йисан вахтунда 800 пешекар — асул гьисабдай механизаторар ва сварщикар гьазурун истемишна. Завай лагьайтIа, ада и кар патал герек шейэриз талукь арза гьазурун тIалабна хъфена. Чирвилер гудай идара 2 сменадин къайдада кIвалахунин гьакъиндай къарардал къул за гьа и юкъуз чIугуна. Пакадин йикъалай чав лазим тир механизмаяр ва тадаракар агакьиз башламишна — сварка ийидай са шумуд цIуд агрегат, 30 бульдозер, экскаватор ва дигидай майишатдин жуьреба-жуьре маса техника. Главкди вилик эцигай месэлаяр тамамарнай ва чна, филиаларни галаз, тахминан 300 сварщик ва 500 механизатор гьазурнай (зи фикирдалди, гьатта къенин юкъузни и кар саки мумкин туширди я).
ИкI, 1973-йисан нетижайралди, “Главдагестанводстройди” чара авунвай такьатрин 97% ишлемишна. Им Главкдин кIвалахдин лап гьейранардай агалкьун тир.
Р.И. Ибрагьимов тешкиллувилин еке бажарагъ авай, вичивайни, амайбурувайни екез истемишунардай, инсанрихъ галаз рафтарвалдайла, дикъетлу, масадан дердиникай хабар кьадай инсан я. Адаз “Главдагестанводстройдин” 30 агъзур касдикай ибарат коллективда екез гьуьрмет ийизвай. Вилик эцигнавай месэлаяр тади гьалда гьялиз алакьунихъ, тешкиллувилин бажарагъдихъ галаз санал адаз инсанрихъ галаз хъуьтуьлдаказ рахаз чида.
Ам кадрийрин хъсан тербиячи я. И карда ада гьамиша куьмек гудай, кIвалах кьиле физвай тегьердал гуьзчивалдай, чпин кIвалах хъсандиз чидай ва намуслу пешекарар майдандиз акъуддай, виниз тир принципрал кIевивал авунин чешне къалурда, гьар са кардив государство патал хийир, Дагъустандин халкьарин итижар фикирда кьуна эгечIда.
И йикъара Рашид Ибрагьимовичан 95 йис тамам жезва. Са кьадар яшдив агакьнаватIани, зегьметкеш инсан тир ада Махачкъаладин карханайрикай сана бухгалтер яз кIвалахзава.
Адахъ галаз санал кIвалахай вири юлдашрин тIварцIелай къе заз газетдин куьмекдалди Рашид Ибрагьимовичаз хайи югъ мубарак ийиз, адав тебрикдин чими келимаяр агакьариз кIанзава.
А. Бегсултанов
