22-28-сентябрдиз Сочида кьиле фейи XXVI форумда
“Лезги газетдин” кьилин редактор Мегьамед Ибрагьимовани иштиракна
Уьлкведин журналистикадин уьмуьрда кьиле фейи лишанлу мярекатда, кьиле РД-дин информациядин ва печатдин Агентстводин руководитель Абдуразакь Жамалутдинов аваз, Дагъустандин делегациядини иштиракна. Дагъларин уьлкведай форумдиз фенвай делегациядик РД-дин Халкьдин Собранидин депутат Ильман Алипулатов, РД-дин журналистрин Союздин председатель Али Камалов, “Дагъустан” РГВК-дин директор Камила Гьамзатова, “Дагестанская правда” газетдин кьилин редактор Бурлият Токболатова, “Дагъустандин дишегьли” журналдин кьилин редактор Наида Керимова ва масабур квай. И важиблу форумда республикадин милли чIаларал акъатзавай газетрин векилрини иштиракна: “Лезги газетдин” кьилин редактор Мегьамед Ибрагьимова, даргийрин “Замана” газетдин кьилин редактор Арсен Юсупова ва къумукьрин “Ёлдаш” газетдин кьилин редактор Гебек Конакбиева.
Форумдин сергьятра аваз гьар са регионди хсуси майданар кардик кутунвай. Къейдна кIанда, Дагъустандин майдан амайбурулай республикадин медениятдиз хас милли кьетIенвилералди тафаватлу жезвай. Жуьреба-жуьре газетринни журналрин, ктабринни альбомрин, милли сеняткарвилерин, халкьдин яратмишунрин выставкайрихъ галаз санал майдандал алай йисуз 90 йис тамам хьанвай Дагъустандин халкьдин шаир Фазу Алиевадиз ва къведай йисуз дидедиз хьайидалай инихъ 100 йис тамам жезвай Дагъустандин халкьдин шаир Расул Гьамзатоваз талукьарнавай стендарни кардик кутунвай.
Форум ачухуниз талукьарнавай кьилин мярекат 23-сентябрдиз кьиле фена. Жуьреба-жуьре регионрай атанвай журналистрин вилик (абурун арада ДНР-дин, ЛНР-дин, Херсондин областдин векиларни авай) РФ-дин журналистрин Союздин председатель Владимир Соловьев, Краснодардин крайдин губернатор Вениамин Кондратьев, ЮФО-да РФ-дин Президентдин патай тамам ихтиярар ганвай Векилдин заместитель Вероника Милинчук ва масабур рахана. Мярекатдин сергьятра аваз РФ-дин журналистрин Союзди журналистикадин рекьяй виридалайни хъсан эсер кхьинай малумарнавай Вирироссиядин конкурсдин гъалибчиярни тебрикна.
Саки гьафтеда давам хьайи форумдин сергьятра аваз уьлкведин регионри чпин презентацияр къалурна, печатдин, электронный СМИ-риз, телевиденидиз талукь элкъвей столар, лекцияр, гуьруьшар ва маса мярекатар кьиле фена. 24-сентябрдиз форумдин выставкайрин залда Дагъустандин журналистикадиз талукь презентация хьана ва 2023-йисуз Расул Гьамзатован 100 йисан юбилей федеральный ва регионрин дережадин СМИ-ра къейд авунин месэладиз талукь элкъвей стол кьиле фена. Адан кIвалахда Владимир Соловьева, Абдуразакь Жамалутдинова, журналистрин Международный Союздин член Алишер Хожаева, Ильман Алипулатова, Али Камалова, машгьур писатель Юрий Полякова, журналистри ва масабуру иштиракна. Вичин рахунра РД-дин информациядин ва печатдин Агентстводин руководителди къейд авурвал, Р.Гьамзатован 100 йисан юбилей неинки са Дагъустан, гьакIни вири уьлкве патал еке метлеб авай вакъиа я. А.Жамалутдинован гафаралди, СМИ-ра ам лайихлудаказ къейд авунихъ еке метлеб ава, гьикI лагьайтIа, халкьдин шаирди вичин хайи мукахъ — Дагъустандихъ галаз санал Урусатни вири дуьньядиз машгьурна. Адан тереф мярекатдал рахай маса юлдашрини хвена.
Форумдин иштиракчийриз неинки са Дагъустандин, гьакIни Татарстандин, Якутиядин, Башкортостандин, Кеферпатан Кавказдин са жерге регионрин милли изданийрихъ галаз таниш жедай мумкинвал авай. И республикайрин милли чIаларал акъатзавай газетрин тиражар са акьван екебур туш. “Лезги газетдин” кьилин редактор Мегьамед Ибрагьимова къейд авурвал, Дагъустанда хьиз, гьанрани милли изданияр кIелзавайбурун кьадар йисалай-суз тIимил жезва. И кардин асул себебрикай сад гзафбуру, иллаки жегьилри, гегьеншдиз интернетдикай менфят къачунихъ галаз алакъалу я.
“Урусатдин маса регионра акъатзавай милли газетрин, журналрин редакцийрин векилри, чна хьиз, чпин хайи чIалар хуьн, вилик тухун патал еке зегьмет чIугвазва. Амма гьар са халкь патал еке метлеб авай и месэла кьилди журналистривайни муаллимривай, хайи чIалал эсерар теснифзавай писателривай гьялиз жедач. Са шакни алачиз, государстводин патай куьмек чарасуз я.
Сочида кьиле фейи форумдихъ регионрин журналистика вилик финин рекьяй еке метлеб ава. Гьа жергедай яз, — милли публицистика патални. Чна маса республикайра хайи чIаларал акъатзавай изданийрин кьилин редакторрихъ галаз гуьруьшар кьиле тухвана, абурухъ авай месэлайрикай, газетдин ери хъсанарун, тираж артухарун патал тешкилзавай мярекатрикай хабарар кьуна. Форум себеб яз, цIийи танишар, фикирар, проектар пайда хьана. Аллагьдин куьмекдалди, чна абур кьилизни акъудда”, — къейдна М.Ибрагьимова, форумдин гьакъиндай вичин фикирар лугьудайла.
Агьмед Магьмудов
