26-сентябрдиз РД-дин Кьил Сергей Меликова Дагъустанда тамам тушир мобилизация тешкилунин месэлайрай совещание кьиле тухвана. “Алатай гьафтеда за, Верховный Главнокомандующийди миллетрихъ элкъвена авур рахунра гайи теклифрив ва талукь тир указдив кьурвал, тамам тушир мобилизация кьиле тухунин тапшуругъ ганай. Амма, аквадай гьаларай, зи гъавурда вири акьунач”, — лагьана, ачухна совещание Дагъустандин регьберди.
Сергей Меликован гафаралди, эхиримжи йикъара хьайи вакъиайри къалурна хьи, военкоматар ва бязи муниципалитетрин кьилер тамам тушир мобилизациядин сергьятра аваз тухудай серенжемрив, асул гьакъикъатдиз килиг тавуна, гьакI винелай эгечIна. Гьа ихьтин рафтарвилер себеб яз, уьлкведин гьалар пайгардикай хкудиз кIанзавай тахсиркаррин кIеретIар агьалийрин четин месэлайрикай менфят къачуз алахъна.
И жигьетдай С.Меликова муниципалитетрин регьберриз лагьана: “Гьар сада вичин участокда уьлкве хвена кIанда. Серенжем ерилудаказ кьилиз акъудиз ва инсанрихъ чин элкъуьриз жезвачтIа, военкоматдиз алад, арза кхьихь, гьа и жуьреда хьайитIани Ватандиз хийир це”.
Региондин Кьили жавабдар къуллугъчийрин ва жемиятдин тешкилатрин вилик, мобилизациядин сергьятра аваз, аскерар кIватIзавай пунктарал финин, абуруз герек тир куьмекар гунин тапшуругъ эцигна. Военный къуллугъчияр кIватIзавай пунктарал Сергей Меликова вични фида лагьана.
Гьакъикъатда военный къуллугъ кьилиз акъудуниз талукь ксар дикъетдалди, гьакъисагъвилелди хкя тийиз, жезмай кьван гзаф инсанар кIватIунин ашкъи авай военкоматарни Дагъустандин регьберди критика авуна. Гьа са вахтунда С.Меликова, РФ-дин Президентдин къарардал асаслу яз, чпин мулкара тамам тушир мобилизациядин гьерекатар хсуси гуьзчивилик кутунвай Махачкъала шегьердин, Табасаран ва Къизляр районрин регьберрин алахъунар хъсанбур яз къейдна.
Дагъустандин меркезда инсанрик акатай къалабулухдиз баянар гуналди, С.Меликова кьетIендаказ къейдна: “Махачкъалада кьиле фейи акцияр къецепатан уьлквейра гьазурнавайбур ва анрай идара ийизвайбур тир”. Малумарайвал, 90-йисара Дагъустанда гьалар пайгардикай хкудайбуруз ухшар къуватри инсанрик акатай теспачадикай менфят къачунин алахъунар авуна.
“Вокзалрал, метройра, Каспийскдин, Буйнакскдин кIвалера хьайи хъиткьинарунар рикIелай алатнавай ксар ава. Къе гьукумди ва жемиятди ихьтин крар тикрар таххьун патал серенжемар кьабулна кIанзава”, — лагьана республикадин Кьили.
Адан фикирдалди, къенин гьалара гьукумдин органри, общественникри, информациядин ресурсри, сад хьана, кIвалахун герек я. Амма абурукай бязибуру къанунсуз гьерекатра иштиракуниз ачухдаказ эвер гузва.
Дагъустанда тамам тушир мобилизация кьиле финикай ихтилатдайла, республикадин вице-премьер Рамазан Жафарова къейд авурвал, военный къуллугъчийриз эвер гунин тапшуругъар, авай ресурсар ва военно-учетный пешекарвилер фикирда кьуна, республикадин военкоматриз пайнава.
“Призывдин анализди къалурзавайвал, РФ-дин Президентдин ва РД-дин Кьилин къарарар тамамарунив вири муниципалитетра сад хьиз жавабдарвилелди эгечIзавач. Идан себебрик муниципалитетрин кьилери военкоматрихъ галаз алакъалувилелди лазим тирвал кIвалах тешкил тавун, гьакIни халкьдихъ галаз гъавурда тунин кIвалахар бес кьадарда кьилиз акъуд тавун акатзава”, — лагьана Р.Жафарова.
Алава хъувурвал, тамам тушир мобилизациядин жигьетдай информация гун патал арадал гъанвай алатрикай дагъустанвийри активнидаказ менфят къачузва. РикIел хкайвал, уьлкведин вири регионра 122 нумрадин «кузвай линия» кардик кутунва. Агьалийри гзафни-гзаф гузвай суалриз жавабар “Объясняем.рф” порталдани чапзава. Идалайни гъейри, Дагъустандин рекъемрин рекьяй вилик финин министерстводи тамам тушир мобилизациядиз талукь яз Telegram мессенджерда югъди-йифди ишлемишиз жедай чат-бот кардик кутунва.
Р.Жафарова малумарайвал, тамам тушир мобилизация кьиле тухудайла, эвер ганвай ватандашар медицинадин затIаралди ва улакьралди таъминарунихъ галаз алакъалу четин месэлаяр авач.
Дагъустандин Кьилин ва Гьукуматдин Администрациядин регьбер Алексей Гьасанова къейд авурвал, мессенджерра, социальный сетра, гуя мобилизоватнавайбур я лагьана, тапан сиягьар чукIуруникди агьалийрик къалабулух акатна.
Сергей Меликова къейд авурвал, ватанпересвиликай ва Ватан хуьникай виридалайни кIевиз рахай бязибур военный къуллугъ кьилиз акъудуниз эвер гуникай къерех жез алахъзава. Гьа са вахтунда, гьеле повесткаяр агакь тавунмаз, гуьгьуьллудаказ военкоматриз физвайбурун кьадарни гзаф я. “Халкьдин ва Ватандин вилик буржи тамамариз, къе гьар са регьбер вичин кIвалахдин чкадал хьана кIанда, эгер герек хьайитIа, — югъди-йифдини”, — лагьана С.Меликова муниципалитетрин регьберриз.
«Лезги газет»
