Дагъустан Республикадин Кьил Владимир Васильеваз Урусрин православиядин килисадин пак князь Даниил Московскийдин кьвед лагьай дережадин орден гана.
Иса Пайгъамбар хайи йикъан (Рождество) сувариз талукьарнавай мярекатар кьиле тухудайла, Махачкъаладин ва Грозныйдин архиепископ Варлаама Дагъустан Республикадин Кьил Владимир Васильеван хиве авай пара важиблу везифайрикай лагьана. Гьа са вахтунда ада къейдна: “Республикадин Кьили неинки регьбервал гун лазим я, ада гьакI куьмек, теселли гун, гъил кьун, дуьз рекье тун, гьа са вахтунда вичин кьилелни Аллагь алайди рикIел хуьн лазим я”.
Махачкъаладин ва Грозныйдин архиепископ Варлаама, Москвадин ва вири Урусатдин пак Патриарх Кириллан разивални аваз, виниз тир агалкьунрай Владимир Васильеваз Урусрин православиядин килисадин пак князь Даниил Московскийдин кьвед лагьай дережадин орден гана.
Владимир Васильева вичин нубатдай урусрин православиядин килисадин Махачкъаладин епархияди тухузвай къени кIвалах, республикада ислягьвал ва меслятвал хуьн, акьалтзавай несил тербияламишун ва марифатдинни ахлакьдин рекьяй тербия гунин жигьетдай кутазвай пай къейдна.
“Инанмиш я хьи, республикадин гьукумдин, чкадин самоуправленидин органрин ва диндин организацийрин арада санал кIвалахунин гьалари яшайишдин ва руьгьдин рекьяй еке къимет авай просветительский проектар, программаяр вилик тухуниз ва кьилиз акъудуниз куьмек гузва. Идахъ Дагъустанда гражданвилин общество арадал гъун патални важиблу метлеб ава. Къуй лайихлу уьмуьр тестикьарзавай инсанриз къени крар авуниз эверзавай и сувар ислягьвални кIанивал галаз гьар са кIвализ, хизандиз мугьман хьурай. Къуй абурун къени мурадар кьилиз акъатрай. Иса пайгъамбардин хайи йикъаз талукь сувар чна вири хашпарайриз тебрикзава”, — лагьана эхирдай Владимир Васильева.
«Лезги газет»
