Дагъустандин тамарин майишатдин комитетди 2019-йисуз, “Экология” милли проектдин сергьятра аваз, “Тамар хуьн” программа кьилиз акъудун патал пландик кутур вири мажбурнамаяр виш процентдин тамамарнава.
Дагъустандин тамарин майишатдин комитетдин председателдин везифаяр вахтуналди тамамарзавай Вагьаб Абдулхамидован гафаралди, региондин «Тамар хуьн» проект 2024-йисалди цIийи тамар кухтунихъ ва абурун кьадар мадни артухарунихъ элкъуьрнава.
Тамарин майданар хуьн, гегьеншарун Дагъустандин тамарин ведомство патал эвелимжи месэла я, гьикI лагьайтIа, республика Россияда тамар тIимил авай регион (тамари кьунвай майданрин кьадар 7,2 процентдиз барабар) я.
И проект кьилиз акъудунин сергьятра аваз Дагъустанди сифте яз тамарин майишат патал лап къалин, физ четин чкайра ишлемишиз жедай цIаяр хкадардай кьве автоцистерна маса къачуна, къейдна В.Абдулхамидова.
Региондин “Тамар хуьн” программа уьмуьрдиз кечирмишунин мураддалди федеральный бюджетдай 2019-2021-йисар патал 130,46 миллион манат чара авунва. И такьатрихъ 2019-йисуз 514 гектарда тамар кутуна, тамун набататрин 5515 килограмм тумар гьазурна, 43,4 миллион манатдихъ цIаяр хкадардай ва тамарин майишатдин техника маса къачуна.
Дагъустандин тамарин майишатдин делилралди, 2020-йисуз региондин “Тамар хуьн” проект кьилиз акъудун патал 41,6 миллион манат серфдайвал я.
“Экология” милли проектдин сергьятра аваз республикадиз федеральный бюджетдин субвенцияр рекье твада. ИкI, цIийи кьилелай 514 га тамар кухтун патал — 13,3 миллион, 5,5 тонн тумар гьазурун патал — 3 миллион, тамарин майишатдин техника ва тадаракар маса къачун патал 19,7 миллион манат чара авун пландик кутунва.
«Лезги газет»
