Сулейман-Стальский районда аялрин 10 бахча кардик ква. Анра чпин кIвалах образованидин уьлчмейрихъ галаз кьадайвал ва виликамаз туькIуьрнавай план-графикрин бинедаллаз кьиле тухузва.

И йикъара чун Вини СтIалрин хуьре кардик квай аялрин бахчадиз мугьман хьана. Ана “Волонтеррин десте” тешкилнавай ва Вирироссиядин “Гъалибвилин тар” серенжемдин сергьятра аваз “Творите добро” мярекатни тухузвай. Мярекатда райондин образованидин управленидин ва аялрин бахчадин пешекарри, бицIекри ва абурун диде-бубайри иштиракна. “Гъалибвилин тар” серенжемдикай мярекатдал “Доброволец России-2017” конкурсдин гъалибчи, студентка, “Волонтеры Победы” ВОД-дин координатор Афият Алиевади гегьенш, итижлу рахунар авуна. Бахчадин бицIекри кьуьлерна, манияр лагьана, гъвечIи сегьнеяр къалурна.

И мярекат волонтеррин отряддин бицIек­ри, Ватандин ЧIехи дяведин гъалибчийрин баркаллувилиз бахшна, аялрин бахчадин гьаятда кутунвай “Гъалибвилин багъда” къелемар акIуруналди акьалтIна.

Гуьгъуьнлай чун аялрин бахчадин заведующий Сегьерханум Гьажиевадихъ, анин пешекаррихъ, бахчада кIвалах тешкилнавай гьалдихъ галаз таниш хьана.

Аялрин бахча хуьре 1969-йисалай кардик ква. Дарамат куьгьнеди ятIани, ана къайда, михьивал ава, экуь ва чими я.

— Алай вахтунда ина 90 аял тербияламиш­зава, — лугьузва С.Гьажиевади. — Аялрихъ галаз школадилай виликан чирвилер гудай, зигьин хкаждай, машгъулардай ва маса мярекатар тухузва.

Тербиячияр тир Теллихан Муталибовадин, Регина Къужаевадин, Дилбер Алиевадин, ашпаз Муминат Къафлановадин, медсестра Фазина Яралиевадин ва амай пешекаррин гьакъиндайни чаз Сегьерханум Гьажиевади разивилин келимаяр лагьана.

Бахчада аялриз йикъа 4 сеферда тIямлу хуьрекар гузва. Ашпаз Муминат Къафла­новади чаз лагьайвал, хуьрекрин сиягьда емишри, абурукай гьазурнавай мижейри кьилин чка кьазва. Абур бицIекриз менфятлу я.

Бахчада чи фикир “Хайи ерияр чирдай пипIе” вичел  желбна. Уьлкведин, республикадин, райондин кьилевайбурун суьретрихъ, гьакIни пайдахрихъ галаз санал ана цурцин, хъенчIин къапари, гъилин регъвери, гам-халича храдай тарари чIехи шаир СтIал Сулейманаз бахшнавай стендди ва маса шейэрини чка кьунва.

2011-йисуз ДГПУ-дин ФДФ акьалтIарай, эхиримжи 5 йисуз ина тербиячи яз кIвалах­завай Регина Къужаевади лагьана.

— Чна бахчада бицIекар хайи макандал, дидед чIалал, бубайрин адетрал ашукьарун патални еке кIвалах тухузва, ЧIехи пай мярекатар дидед чIалал тешкилзава .БицIекри фасагьатдаказ лезги чIалал хуралай шиирар кIелзава, гъвечIи сегьнеяр тамамарзава. Ми­сал яз, мукьвара чна лезги чIалал “НуькI хала” мах сегьнеламишна.

Бахчада кар­дик квай хайи ерияр чир­завай  пIипI гележегда музейдиз элкъуьрдай фикир ава, и кар патал экспонатар кIватIзава.

Чаз чкадал акурвал, Вини СтIалрин аялрин бахчада кIвалах хъсандиз тешкилнава.

Хазран Кьасумов