CтIал Сулейманан район образованидин рекьяй вилик финик еке пай кутунай, яргъал йисарин бегьерлу зегьметдай, гьакIни 70 йис тамам хьунихъ галаз алакъалу яз, Цмуррин юкьван инновациядин школада урус чIаланни литературадин тарсар гузвай муаллим (образованидин еридин рекьяй директордин заместитель), Россиядин Федерациядин умуми образованидин Гьуьрметлу къуллугъчи Османова Индира Гьажибалаевнадиз и йикъара муниципалитетдин кьил Саид Темирханова райондин кьилин тIвар кхьенвай гъилин сят багъишна.
Михьи рикI, ширин мез авай Индира Гьажибалаевнадикай рахадайла, ам чидай вирибуру лугьуда: «Адаз вичин рикI тирвал ганва».
И.Гь. Османова районда ва адалай къецени гзафбуруз къени инсан, тежрибалу педагог, савадлу регьбер яз чида. Вичин лайихлувилериз килигна, адан уьмуьрдин ва зегьметдин рехъ куьрелди рикIел хкин.
Индира 1955-йисан июндиз Махачкъала шегьерда гьуьрметлу хизанда дидедиз хьана. Гьеле школада кIелзавай йисарилай муаллимвилин пешедал ашукь руша 1974-йисуз Дербентдин педучилище акьалтIарна. 1974-1981-йисара ада Кьулан СтIалрин юкьван школада сифтегьан классрин муаллимвиле кIвалахна.
Чирвилерихъ къаних И. Османовади 1981-йисуз Дагъустандин госуниверситетдин филологиядин факультет акьалтIарна. 1996-йисалди Кьулан СтIалрин школада урус чIаланни литературадин тарсар гайи, коллективдин патай гьуьрмет къазанмишай Индира Гьажибалаевна школадин директорвилин жавабдар къуллугъдал тайинарна.
Са куьруь девирда ада школа районда вилик жергейриз акъудна, муаллимрихъ — кIвалахда, аялрихъ кIелунра, спортда агалкьунар хьана. Ихьтин нетижаяр, агалкьунар, лайихлувилер себеб яз, И. Османовадиз Дагъустан Республикадин образованидин министерстводиз кIвалахал теклифна. Ада 2003-йисалай министерствода умуми образованидин управленида кьилин пешекар яз кIвалахна. 2006-йисуз Индира Гьажибалаевна образованидин министерствода инспекторвилин ахтармишунрин, гуьзчивал авунин отделдин кьилин пешекарвиле тайинарна. Гуьгъуьнлай адакай и отделдин начальник, аялар социальный рекьяй хуьдай отделдин кьилин пешекар-эксперт хьана.
РД-дин образованидин министерствода винидихъ тIварар кьунвай жавабдар везифаярни намуслудаказ кьилиз акъудна.
Хъсан чирвилер авай, тешкиллувилин кIвалах алакьдай пешекар Индира Османова райондин кьиле авайбуру Дагъустан Республикадин образованидин министерстводихъ галаз меслятна, СтIал Сулейманан райондин образованидин управленидин начальниквиле тайинарна.
Жавабдар и везифаяр кьиле тухвай йисара ада школайрин ва аялрин бахчайрин алатринни техникадин бине мягькемарна, пешекарриз кIвалахдай хъсан шартIар яратмишна.
Аквазва хьи, 1974-йисалай Индира Гьажибалаевнади педагогикадин рекьяй галай-галайвал винелди камар къачуна. Ада тарсар гайи аялрин чирвилерин дережа гьамиша винизди (95, 99 процент) тир. Гьавиляй адан виликан ученикрикай зурба алимар, чIехи дережайрин гьакимар, инженерар ва маса пешейрин сагьибар хьанва. Индира Гьажибалаевна чешне хьана, муаллимвилин пеше хкягъай гадайрин ва рушарин кьадарни гзаф я.
Пуд йисуз райондин образованидин управленидин начальниквиле бегьерлувилелди зегьмет чIугурдалай гуьгъуьниз Индира Гьажибалаевна ЦУР-дин регьбервиле тайинарна. И везифаярни ада уьзягъдаказ кьиле тухузва.
Индира Османовадихъ зегьметдин 45 йисан стаж ава. Идакай 30 йисалай виниз ада педагогвиле кIвалахна, и кар давамарни ийизва. Алай вахтунда вичиз районда «образованидин хилен профессор» лугьузвай Индира Гьажибалаевнади Цмуррин юкьван школада урус чIаланни литературадин тарсар гузва, кIвалахда алай аямдин къайдаяр ишлемишзава.
Зурба писатель Лев Толстоя лагьанай: «Эгер муаллим анжах вичин пешедал ашукь ятIа, ам хъсан муаллим я. Эгер муаллимдиз ученик дидедизни бубадиз хьиз, кIан ятIа, ам, вири ктабар кIелна, амма кIвалахда ашкъи авачир муькуь муаллимдилай артух хъсанди жеда. Эгер муаллимдиз вичин пешени, аяларни сад хьиз кIан ятIа, ам акьалтIай муаллим я». Эхиримжи гафар Индира Гьажибалаевнадизни талукь жезва.
И. Османова Цмуррин школада образованидин ери идара авунин дестедин кьил, жегьил муаллимрин насигьатчини я. Ада пешекарвилин дережа датIана хкажзава, школада ва районда тухузвай саки вири мярекатра иштиракзава.
Яргъал йисарин намуслу загьметдай Индира Гьажибалаевнадиз «Почетный работник образования Республики Дагестан» знак, «Почетный работник общего образования Российской Федерации» гьуьрметдин тIвар, РД-дин образованидин министерстводин, муниципальный райондин гьуьрметдин грамотаяр, «Цмурская СОШ» МБОУ-дин патай Чухсагъулдин чар ва маса шабагьар ганва.
Индира Гьажибалаевна РД-дин госкъуллугъдин 3-классдин советникни я.
— Ученикрин, абурун диде-бубайрин, кIвалахдин рекьяй юлдашрин патай кIанивал ва разивал зун патал виридалайни чIехи шабагь я, — лугьузва Индира Гьажибалаевнади.
Тежрибалу муаллим, жегьилрин насигьатчи хьиз, И.Османова гьа са вахтунда кIвалин къул хуьзвай кайвани, ферли пуд веледдин диде, 4 хтулдин бадени я.
Баркаллу юбилей рикIин сидкьидай мубарак авуналди, чаз Индира Гьажибалаевнадихъ мягькем сагъламвал, хизанда хушбахтлувал, кIвалахда мадни еке агалкьунар хьана кIанзава.
Хазран Кьасумов
