Дагъустан Республикадин хуьруьн майишатдин ва недай суьрсетдин министерстводи хабар гузвайвал, лапагар гатун чIурариз хутахунин кампания саки кьилиз акъуднава. Серенжемдин сергьятра аваз, тахминан 1,3 миллион кьил хипер ва цIегьер куьчери малдарвилин аранда авай чуьллерай кьакьан дагъларин яйлахриз хутахнава.
ТIебиатдин татугай шартIарихъ галаз алакъалу яз, яргъалди чIугур марфар къуникди ва дагълух районра живер хьуникди гьайванар хутахунин вахт кьулухъ яна.
Эхиримжи делилралди, саки вири гьайванар дагъдин чуьллерив агакьнава. Гатун яйлахривай хейлин яргъа авай (600 километрдилай гзаф) майишатрин гьайванар патал улакьар (машинра аваз тухун) тешкилнавай. 300 километрдилай яргъал тушир чуьллериз гьайванар адетдин къайдада, яни яхдиз хутахна.
Хабар гузвайвал, гатун чIурариз хутахдалди вилик Аркабашдин, Сулакдин, Къизилюртдин, Мамрашдин, Алмалидин, Кочубейдин купкадин станцийрал вири гьайванриз талукь яз чарасуз тир ветеринарный серенжемар кьилиз акъудна. Инра лапагрилай сарни твана.
ЧIарода, Ахцегь ва Ботлих районрин майишатри лапагар хутахунин серенжем фад акьалтIарна. Гьайванар яйлахриз вахтунда хутахуни къишлахрин чилер гуьнгуьна хутадай, абур хъуьтIуьн сезондиз ерилудаказ гьазур хъийидай мумкинвал гузва.
Дагъустан Республикадин хуьруьн майишатдин ва недай суьрсетдин министерстводи гьайванар къишлахрай яйлахриз хутахунал гуьзчивалзава ва и кампания саламатдиз кьиле тухун патал майишатриз чарасуз тир куьмекарни гузва.
Амина Муслимова
