Мукьвал-мукьвал ихьтин итижлу месэла арадал къвезва: эгер кIвалин иеси сад яз, ана прописка авунвайбурун кьадар гзаф ятIа, коммунальный (яшайишдин) къуллугърай гьакъи ни гун лазим я?
Документриз килигайла, кIвалин иеси яшлу кас, пенсионер тир (ада ишлемишзавай коммунальный къуллугърин кьадар са акьван екеди туш) дуьшуьшар мукьвал-мукьвал гьалтзава. Гьа са вахтунда квартирада (кIвале) прописка авунвайбурун кьадар тIимил туш: хва, руш, свас, хтулар, гьатта птуларни кваз. Вири и ксари коммунальный къуллугърикай артухни алаз менфят къачузва. И харжияр вири чIехи несилдин къуьнераллаз жезва, вучиз лагьайтIа, квитанцияр, маса чарар абурун тIварцIел къвезва.
И жигьетдай гъавурда тун лазим я. Закондал асаслу яз, кIвале яшамиш жезвай ксарал виридал — хсусиятчидал ва я адан хизандин векилрал сад хьтин жавабдарвал ала, — эгер хсусиятчийри ва адан хизандин векилри чпин арада маса икьрар кутIуннавачтIа.
Эгер яшайишдин рекьяй авай къулайвилерин гьакъи кьве вацралай артух вахтунда ганвачтIа, бурж алудун патал суддиз арза гайитIа жеда. Ресурсралди таъминарзавай тешкилатдивай коммунальный къулайвилерай рейсадвилелди пул тагузвай инсанрин аксина буржлувиликай хкечIун патал, арза кхьена, абур суддиз вугайтIа жезва. Судди къарар кьабулайдалай гуьгъуьниз буржлубур вири — кIвалин иеси яни, ана яшамиш жезвайди яни килиг тавуна, банкарин ва эменнидин счетар кьунин къурхулувилик акатзава.
Ахьтинбуруз къецепатан уьлквейриз фидай, машин регистрация ийидай ихтиярар гудач. «Газпром межрегионгаз Махачкъала» ООО-ди рикIел хкизва: коммунальный къуллугърай гьахъ-гьисабар вахт-вахтунда авун, гьакъи вахтунда гун хийирлу я. Низамлудаказ пул гузвайбуруз яшайишдин къулайвилерикай хкудунин, судра гьатунин ва маса вижесуз серенжемрик акатунин хаталувал авач.
Карханади ишлемишзавай газдин гьакъи, кассадихъ тефена, дистанционный къайдада гунин мумкинвилер авайдини рикIел хкизва. И кар патал «Зи газ» ва я «Газ онлайн» приложенияр ишлемишун, я тахьайтIа, «Газпром межрегионгаз Махачкъала» компаниядин сайтда «Хсуси кабинет» ачухун бес я.
Амина Муслимова
