ТIугъвалдиз — ваъ!
Эхиримжи кьве йисуз дуьньяда инсаниятдин лап важиблу, вичикай гзаф рахазвай ва халкьарик къурху кутазвай месэлайрикай сад коронавирусдин тIугъвалдиз талукьди я. Гьелбетда, инсандиз эвелимжи нубатда герекди чандин сагъвал я, ахпа — амай вири шейэр, няметар. Алай вахтунда Ахцегь районда эпидемиологиядин жигьетдай авай гьалар хъсанарун ва азардин вилик пад кьун патал тухузвай серенжемрикай чна ЦРБ-дин кьилин духтур Митгьедин Мурсаловахъ галаз суьгьбетна.
— Аллагьдиз шукур хьуй, сифтегьан вахтарив гекъигайла, исятда районда эпидемиологиядин жигьетдай гьалар хъсан я. Азарханадин “яру зонада” авай 10 чарпайдикай (са вахтунда 35 чарпайдикай садни буш тушир) 9-дал азарлуяр ала: анжах садак ковид квайди тестикь хьанва, 8 кас вирусди арадал гъанвай стIалжемдикди начагъбур я. Абур сагъарун патал герек дарманринни алатрин игьтияж авач. Коронавирусдиз акси рапар ягъуникай рахайтIа, и кардив эгечIай бередилай (2021-йисан март) инихъ 10140 кас (56%) вакцинация авунва. Анжах са эхиримжи гьафтеда 1468 касди рапар янава. Абурукай 244 ревакцинация авунвайбур я. Им пис нетижа туш, республикадин районрин арада юкьван дережа я. Дагъустандин здравоохраненидин министерстводай райондив вири 12 728 раб (доза) агакьарнавай.
Азардин вилик пад кьун патал еке фикир чна ПЦР тестриз, дезинфекциядиз гузва. Чи медработникри, гьар са идарадиз физ, биопробар къачузва. ИкI, вири 1271 биопробдикай 896 эхиримжи гьафтеда къачунва.
Гьелбетда, хъсан нетижаяр чеб чпелай арадал къвезвайди туш. Чи коллективди гьакъисагъвилелди зегьмет чIугвазва, жемят дуьз гъавурдик кутунин кIвалах тухузва. Месела, вакцинациядин месэладал поликлиникадин коллектив, мобильный кьве бригада ва махсус ФАП машгъул я. Кьиле поликлиникадин заведующий Саният Урдуханова аваз участокрин духтурри — Тельман Исламова, Сабина Палчаевади, Женя Исламовади, Ирена Асваровади, Хатужат Ашуралиевади, рентгенолог Ильмудин духтурди еке зегьмет чIугвазва. Участокрин больницайрикай хъсанбурукай яз Хуьруьгрин хуьруьн больницадин (кьилин духтур — Мавлуьдин Рамазанов) тIвар кьаз жеда.
— Митгьедин Садединович, коронавирусдин, иллаки хаталу “омикрон” штаммдин, вилик пад кьадай гьихьтин серенжемар кьабулзава?
— Гьелелиг “омикрон” штамм районда авач, республикада малум хьанвайди са дуьшуьш я, мад хьунни тавурай. Амма вилик пад кьунин серенжемар сад хьтинбур я: рапар ягъун, маскаяр алукIун, хсуси гигиена хуьн, пара инсанар кIватI жезвай чкайрикай кьил къакъудун, азар гьисс авунмазни, участокдин духтурдиз хабар гун.
Эхирдай къейдин, азардин вилик пад кьадай ва адахъ галаз женг чIугвадай жавабдар месэла чна гьар гьафтеда Ахцегь райондин кьил Осман Абдулкеримован регьбервилик кваз муниципалитетдин Оперштабдин ва райадминистрациядин активдин заседанийрал гьялзава, кьиле тухун лазим тир серенжемар тайинарзава, кIвалахрин нетижаяр кьазва. Еке куьмек чна чи кIвалахда райадминистрациядин кьилин заместителар тир Вадим Агъасиеван, Расим Османован, Гьажи-Омар Рамазанован, Роберт Гьамзатован патайни гьиссзава. Вири пара кьадар сагърай! Умуми къуватралди чна азардин вилик пад кьада.
Дашдемир Шерифалиев
