И йикъара Белиждин гимназиядин актовый залда поселокдин администрацияди дуланажагъдин жигьетдай тIимил таъмин хизанрай тир аялриз ва хъсан муаллимриз, “Аялар чи гележег я” мергьяматлувилин мярекат тешкилна, шад гьалара кьиле тухвана. Ана Белиж поселокдин кьил Рамиз Гьабибулаева, адан заместителри, поселокдин собранидин депутатри, школайрин директорри, общественный тешкилатрин векилри, аялри ва диде-бубайри иштиракна.
Сегьнеда милли парталар алай гимназиядин аялри ва искусстводин школада чирвилер къачузвайбуру чпин алакьунар, манияр лугьуз, шиирар кlелиз, кьуьлер ийиз, къалурна. Итижлу мярекат хьана. Ам хъсан дережада аваз Саижат Гьабибовади кьиле тухвана.
Мярекатдал рахай Рамиз Гьабибулаева, школайрин директорар — Нариман Шихмегьамедова, Магьмуд Магьмудова, Имара Заловади ва масабуру, алукьнавай Цlийи йис мубарак авуналди, ам шад хабарар гвайди, рикlевай хъсан мурадар кьилиз акъатдайди, кlелунра агалкьунар авайди ва мягькем сагъвал аваз кьиле тухудайди хьун алхишна.
Тlугъвалдикай хуьнин шартlарал амал авуналди тухвай мярекатдиз эвернавай 100 аялдиз ва образованидин хиле кlвалахзавай хъсан 9 муаллимдиз поселокдин кьилин, мергьяматлувилин мярекатдик экечlай маса карчийри чпин патайни пишкешар гана.
Мярекат кlватl хьанвайбурун рикlел аламукьдайди хьана.
Къагьриман Ибрагьимов
