И йикъара Москвада Советрин Союздин ва Урусатдин машгьур актер, РСФСР-дин лайихлу артист, РФ-дин Государстводин премиядин лауреат, “Ватандин вилик лайихлувилерай” ордендин II дережадин медалдин сагьиб Расми (Рамзес) Халидович Жабраилов кечмиш хьана. Адан 90 йис тир.
Р.Х.Жабраилов Кьасумхуьрел дидедиз хьана. 1955-йисуз — ГИТИС-дин актервилин, 1961-йисуз режиссёрвилин факультетар акьалтIарна. Жуьреба-жуьре йисара лезгийрин, даргийрин милли театрра, Махачкъалада авай Урусрин, Тула областдин театрра кIвалахна.
1962-йисалай Москвадин Таганкада авай театрдин актер тир. 2002-йисуз ада вичин яратмишунрин рехъ Москвадин В.Маяковскийдин тIварунихъ галай академический театрда давамарун кьетIна. Расми Жабраиловаз “Следствие ведут знатоки”, “Одиссея капитана Блада” фильмайра, “Марш Турецкого”, “Моя прекрасная няня”, “Люба, дети и завод” сериалра тамамарай ролри еке машгьурвал гъана.
Къейд ийин хьи, Р.Жабраилован рехъ адан руша давамарзава: Мадлен Жабраилова актриса я. Урусатдин лайихлу артистка тир адан 51 йис я. М.Жабраиловади Москвадин “Мастерская П.Н.Фоменко” театрда кIвалахзава.
«Лезги газет»
